Edicion record di e “Ronde van Aruba”  a conclui exitosamente cu 813 participante

ORANJESTAD (AAN): E di 34 edicion di e “Ronde van Aruba” tabata exitoso y lo pasa den historia como e edicion mas grandi di tur tempo.

Un total di 813 participante  a tuma parti na e evento di coremento di 72 kilometer, procedente di Aruba, Hulanda, y Inglatera. E evento deportivo mas grandi di Aruba, organisa pa Oficina di Deporte di Kazerne di Marina Savaneta, a trece hunto un grupo diverso di participante e aña aki. Mas o menos 30% di e participantenan tabata militar, mientras cu 70% tabata consisti di residentenan local y entusiastanan di deporte for di Hulanda y Inglatera.

E ruta cu hopi reto rond di Aruba a brinda un combinacion unico di prestacion fisico y  experiencia insular. Tanto coredornan individual como ekiponan a entrega actuacionnan impresionante den condicionnan cayente y a wordo aplaudi durante e trayecto pa sostenedornan.

“E cantidad record di participante ta mustra cu e “Ronde van Aruba” ta sigui crece como un evento deportivo cu un conexion social fuerte,” asina Jeffrey Wassenburg, Hefe di Oficina di Deporte na Kazerne di Marina Savaneta, a duna di conoce. “E colaboracion entre forsanan arma, boluntarionan, y e comunidad di Aruba, un biaha mas a resulta den un evento sigur y exitoso.”