Un docente lo cende antorcha y otro ta core rond cune:
ORANJESTAD (AAN) – Señor Edgar Erasmus di IBiSA, a amplia e informacion tocante e weganan escolar (WEAruba), cual oficialmente tin su apertura Diabierna otro siman, 17 di Juni.
Erasmus a indica cu for di cuminzamento di aña escolar, e programa di deporte escolar ta wordo hiba parallel cu e aña escolar.
Kiermen, e alumnonan ta wordo involucra cu deporte for di trempan, pues asina aña habri. Encuanto e WE, specificamente, dia 17 di Juni ta bay ta e apertura y lo clausura dia 25 di Juni.
Den e diferente deportenan cu lo competi, lo tin deporte den team y deporte individual. Scolnan preparatorio, basico y avanza lo forma parti di e programa di WE. Un total di 20 scol a clasifica caba pero ainda tin mas scol cu por inscribi. Erasmus a duna di conoce cu esaki pasobra nan a duna oportunidad ainda na scolnan cu no a logra clasifica, pa nan participa den e “kids rond”, “Kids athletics” y tambe un baile deportivo cu lo wordo carga pa DCA cu lo yuda cu e parti di baile.
“Nos ta duna oportunidad pasobra esey ta importante pa tur mucha tambe forma parti di e ‘WE’ y esey ta haci esaki hopi interesante, pasobra esnan cu no logra clasifica, ainda tin chens di forma parti di WE”, Erasmus a reitera.
APERTURA:
Edgar Erasmus a informa cu pa e acto di apertura a scoge dos docente; uno pa cende e antorcha y otro pa core cu e antorcha. Esaki pa motibo cu sin e apoyo di scol, docente y mayornan, e deporte escolar lo bira dificil. “Pasobra nan ta zorg pa promove y motiva e muchanan pa bin cu nan. Naturalmente, esnan cu nos a scoge ta esnan cu ta dedica hopi tempo y esfuerzo den e deporte escolar, y a participa den casi tur e deportenan escolar cu nos tabata tin di IBiSA, y esey ta un criteria cu tambe ta duna nan e honor pa haci e parti di inicio di e weganan escolar cu loke ta e antorcha”, Edgar Erasmus a declara.
PREMIACION:
Erasmus a duna di conoce cu e premiacion ta tuma lugar na final, esta dia 25 di Juni. El a agrega cu intencion ta pa haci e clausura un evento grandi tambe. Kiermen un mega clausura, unda tur hende ta bin bek stadion busca nan premio, pa asina por haci e ciere di e weganan escolar cu un espectaculo bunita, cu entregamento di premio, y tambe e candela olimpico lo paga e dia aki y asina lo cera e Weganan Escolar-2022.
