ORANJESTAD (AAN) - Shonnan amante di domino LTE (“Latest Technology”),
e fin di siman aki, diasabra 30 di juli cuminsando pa 8’or di anochi, lo ta bay tin otro
sambombaso di domino ora e legendarionan di pariba di brug, esta Pariba Legends
DT, crusa bin abou bin topa cu nada menos cu e durisimonan di Sero Blanco DT
n’e unico y mundialmente famoso Domino Square Garden aya net na e grens entre
Calabas y Kudawecha.
Si señores, despues di e hazaña di siman pasa caminda Snor Perez a fungi como “bliksemafleider” wantando tur sla mientras cu resto di su team tabata suta rond, awor otro team grandi di pariba di brug kier bin abou y demostra cu “the best domino” na Aruba ta pariba di brug! Es mas, segun rumornan ta core rond varios integrante di Pariba Legends kiermen cu ya nan a yena aplicacion na DOW pa
cambia e nomber dje bario di Sero Blanco pa Sapato Blanco! Algo facil segun nan, cu un
minimo na costo, ya cu e abreviacion ariba tur cas lo keda mescos y no tin cu cambia
nada na departamento di Post NV.
Un tarea pues shonnan cu no lo ta bay ta facil! Team Sero Blanco ta conoci como un
dje ekiponan mas duro den liga y sigur sigur lo haci tur lo posibel pa pone e
“legendarionan” di pariba “zing een toontje lager”! No ta prome team cu a yega na
Domino Square Garden cu e idea cu ta “White Hill Sweet Bread” nan lo bay come, pa
despues keda cu smaak marga den boca y cu cara di burico cu a come wanglo
despues di haya sota cerca Team Sero Blanco!
Wel shonnan, diasabra anochi lo haya sa ta con ta separa “the men from the boys”
aya n’e famoso Domino Square Garden, ora Team Sero Blanco enfrenta Team Pariba
Legends! Manera semper, entrada ta completamente gratis.
Bini un bini tur pa wak e candeloso encuentro entre Team Sero Blanco y Team Pariba
Legends, diasabra anochi benidero 30 di juli, cuminsando pa 8’or di anochi, aya na
Calabas!
