E posible peor umpire di Major League Baseball a dicidi na retira

Angel Hernández ta famoso pa decisionnan incorecto

NEW YORK: E persona di mas controversial den Grandes Ligas na Merca, kende desde 1991 ta fungi como umpire pa Major League Baseball, a dicidi e siman aki cu e ta bay retira.  Angel Hernández ta universalmente conoci pa su decisionnan incorecto, su capacidad limita di comunicacion, y su falta di boluntad pa baha cabez y hala atras ora cu el a comete eror.

   El a fungi como arbitro pa miles di wega, incluyendo esnan di Serie Mundial, pero dos biaha el a demanda MLB sin exito pa supuesto discriminacion racial.  E tabata acusa cu intencionalmente MLB tabata evita cu e ta haya promocion pa bira crew chief, y di sigui fungi como umpire den weganan di Serie Mundial.

   El a retira Diamars despues di un negociacion di varios siman largo, cu a finalisa den un acuerdo financiero.

   Angel Hernández a nace dia 26 di Augustus 1961, y tin antecedente Cubano.  El a traha den National League for di 1991 te cu 1999, y despues pa henter MLB for di 2000 te cu awor.  E umpire di 62 aña di edad a traha su ultimo wega Diahuebs tres siman pasa, esta 9 di Mei, como Umpire di home-plate den e wega unda Chicago White Sox a gana Cleveland Guardians cu score di 3-2.  E no a regresa mas pa ningun wega, y awor a retira.

   Na comienso a core rumor cu MLB mes a fada di e erornan cu e ta comete den wega, y a acerk’e pa puntre si e kier sali di e carera ey.  Asina a core rond e informe cu nan lo a forz’e pa retira, sinembargo su abogado a insisti cu e no a wordo forza pa sali.  E mes a tuma decision di retira, y a ricibi un pakete financiero.

   Umpire Hernández tabata envolvi den diferente incidente controversial, y a wordo hopi critica pa hungadornan, multitud di coach, y fanatico den henter su carera.

   Un encuesta na 2006 y tambe 2011 di e revista Sports Illustrated entre peloteronan, a divulga cu Angel Hernández a finalisa como #3 di e peor umpire di baseball.  Na aña 2010, un encuesta di ESPN a mustra cu 22% di peloteronan a identifica Hernández como e peor umpire den Grandes Ligas.

   Durante temporadanan di 2016, 2017, y 2018, e decisionnan di Hernandez na primera base, a wordo revoca 14 di 18 biaha cu a haci revision di video.  Pues 78% di overturn rate, sobrepasando e 60% overturn rate di tur otro umpire den e mesun periodo.  Hasta Boston University a haci un estudio, y a descubri cu Angel Hernandez ta comete 19 decision incorecto pa cada wega, cu ta igual cu 2.2 fout pa cada inning.

   The Sporting News a publica cu Hernández “a logra un reputacion di ta un di e peor umpire di MLB”.  The Boston Globe a publica cu Hernández “tin un reputacion como un di e peor umpire di Baseball”.  The New York Post a publica cu e ta “e peor umpire den baseball”.

   E temporada di 2023 el a actua como umpire den solamente 10 wega, pasobra el a sufri un lesion despues.  Pero den e 10 weganan ey so, segun Sports Illustrated, el a haci yamadanan robez como 161 biaha.  Y su precision di strike zone den wega di 14 di September entre Pirates y Nationals, tabata esun di mas malo compara cu cualkier otro umpire den ultimo cinco aña.

   Diamars atardi y anochi, social media tabatin un euforia di celebracion.  Nan ta contento cu e Umpire aki procedente di Florida a sali di Major League Baseball.  E tabatin semper fanaticonan furioso, pasobra nan tabata consider’e un Umpire inutil cu ta haci weganan bira inhusto cu su erornan garafal.  Nan ta considera Diamars 28 di Mei 2024, como un “Dia Glorioso pa Baseball”.