E muchanan di Red Machine di 7 y 8 aña a keda masha contento cu nan uniform nobo

ORANJESTAD(AAN): Recientemente a batiza e uniform nobo pa e muchanan di categoria di 7 y 8 aña di Red Machine

tuma lugar bautismo di uniform nobo den un entrevista Gerlien Croes, boluntario di Red Machine a splica cu tur cos rond di e muchanan di Red Machine por wordo considera un exito, mirando cu den e ultimo 4 añanan e desaroyo di e muchanan tabata obvio, mientras cu den e diferente campeonatonan e muchanan tabata hopi exitoso.

Croes a splica cu den e ultimo 3 añanan Red Machine a bira campeon den diferente campeonato.

“Bunita ta cu bo ta wak directamente locual bo ta duna na e muchanan”.

Mi mester gradici e managers, e coachnan y tur esnan cu ta yuda  nos hungadornan, specialmente e mayornan den e comision di mayor, cu ta trek e team aki y yuda hacie un exito, segun Croes.

El a sigui bisa cu unda cu na 2019 e categoria aki di edad di Red Machine tabata tin apenas 12 pa 13 mucha, awor na 2022 esaki a crece bira casi 80 mucha.

“Nos ta contento di wak cu e farm system di Red Machine tey bek”.

Semper lo mi sigui duna mi sosten y apoyo na Red Machine y mi ta spera cu nos por sigui conta riba e trabao boluntario di e managers y coachnan, pasobra sin nan bo no tin e teamnan.

Mi ta spera cu e organizacion lo sigui crece, pasobra nos tur sa cu deporte ta clave y necesario den e desaroyo di nos muchanan y desaroyo di nos pais, segun Croes.