E di cuater ‘Copa Roy Croes’ di SV Unistars ta sigui e weekend aki na Yara

ORANJESTAD (AAN): Weekend cu a pasa, e di 4 torneo Copa Roy Croes a cuminsa na Compleho Deportivo Yara.

E torneo ta sigui diahuebs awo 28 augustus te cu diadomingo 31 di augustus cu e gran final. Tin diferente clubnan participando, cu bar y cushina bon surti.

   E torneo aki ta na honor di e fundador, presidente, trainer, coach y tata di e presidente actual di S.V. Unistars. Señor Roy Croes, den Feliz memoria, ta hopi conoci den e bario di Pos Chikito y Savaneta. Casi 40 aña pasa, a funda S.V. Unistars pa asina tene e muchanan di bario for di caya. Su lema tabata tambe: “Un futbolista mas ta un delincuente menos”. Desde e momento cu a funda S.V. Unistars e ekipo di futbol a conoce diferente categorianan.

   E clubnan participante ta Caravel, Caiquetio, Rooi Afo, Atlantico, Jong Aruba, Sportboys, Unistars, Estrella (40plus), Teachers (40 plus). Diasabra anochi tin un wega special di Unistars Legends cu hungadornan bieu di Unistars.

   S.V. Unistars ta invita henter pueblo di Aruba pa atende e torneo aki pa asina brinda un homenahe na un Buluarte importante den e mundo di futbol na Aruba.