Diasabra awor lo tin un fenomenal Bike Ride observando prome aniversario di Gonz Riders

E lo bay ta completamente gratis

ORANJESTAD (AAN): Den fin di siman durante un encuentro cu prensa na Bushiri Karting, e dirigentenan di e grupo local di Bikers, esta ‘Gonz Riders Aruba’, a convoca un conferencia di prensa pa asina reflexiona riba nan prome aniversario di existencia.

   President, e dama simpatica Maga, a splica cu nan ta contento cu e enorme sosten ricibi den e 365 dianan cu a pasa.

   Nan a reflexiona cu e 12 lunanan aki a pasa rapido como Team nobo di Bike.  Manera ta conoci, “Gonz Riders Aruba” a tuma su nomber for di e bunita nomber di e parha local di Gonzalito.

   Unavez cu nan a keda estableci dia 2 Maart 2023, rapidamente nan a cuminza haya mas miembro y asina crece den forma satisfactorio.  Y pa observa e fecha special aki, Gonz Riders Aruba ta preparando pa organiza un Bike Ride.  Esaki lo bay ta riba Diasabra 2 di Maart 2024, y e salida lo ta for di “Fransjes Bar”, cu ta situa na segundo piso di Olde Molen.  Tur hende lo aglomera eynan alrededor di 6:30 pm.

   Nan Bike Ride mes lo sali pa 7:30 pm, y lo bay core un ruta y nan prome stop lo bay ta na e establecimento di ‘Ban Dal Dos’ na Meiveld.  Despues di e stop, lo bolbe core y e final di e Bike Ride lo bay ta na Bushiri Karting.  Aki lo tin animacion musical di DJ Jeff.  Pa cera anochi, Bushiri Karting ta regala grupo musical ‘Honey Pot’.

   Maga a splica cu e Ride aki ta gratis, no tin costo.  E ta un momento pa comparti un anochi agradable cu tur demas miembro y invitadonan.  Esey nifica cu cualkier Biker di Aruba por participa, y no ta necesario pa inscribi.  Djis percura pa bo yega 6:30 pm y prepara pa e salida.

   Gerente general di Bushiri Karting, esta Carlos a indica cu e idea cu tin pa corda cu Bushiri Karting Street Bikes ta forma parti di e team, pa asina tur Bikers sinti nan mes na cas, pues famia por tey eynan tambe.  Bushiri Karting lo bay ofrece specials riba cerbes y cuminda tambe.  Y nan semper ta habri pa cualkier idea di tur hende pa asina pone e lugar ta activo, organisando diferente evento.  Tin hasta pensa di organisa caredanan di Karting pa e mihor driver di e diferente clubnan di Bikers cu tin rond Aruba.