ORANJESTAD (AAN) – Diabierna 12 di Mei 8'or di anochi Carl a hunga su ultimo wega official pa SV Britannia den stadion Frans Figaroa na Noord.
Carl Geerman semper a duna tur locual e tin ariba veld y awor lastimamente Carl J.A. Geerman mester retira awor cu 26 aña for d e deporte cu tanto e la stima y ta sigi stima.
Carl ta yui di Juraine Croes y Carlos Geerman actual keeper di SV Britannia y a nace 23 maart 1997 na Aruba.
Carl a cuminsa hunga futbol cu su 4 aña den division Baby pa SV Britannia cual team semper e la keda fiel na dje. Tempo cu Carl a cuminsa hunga futbol ta tempo cu Britannia a reactiva su division di LIFIDA y e tempo ey bao encargo di Buchi “Panama” Wever.
Adhunto por wak algun potret di e tempo ey.
Carl semper a dedica cu hopi amor y pasion na su futbol. Semper e ta gradici su coachnan Ivo Lacle, Calin Lacle, Hubert Hart, Leo Feliciana, Cedric Werleman y mucho mas cu a jude desaroya su futbol y amor pa e deporte rey. Ivo Lacle semper tabata tin confiansa den Carl y asina semper tabata pidie pa e hunga un division mas halto pa Britannia. Tin biaha Carl tabata 7 dia pa siman ariba veld.
Tambe Carl a forma parti di diferente seleccion di Aruba manera tur e divisionnan di LIFIDA y titula campeon di Lifida Baby, Lifida A, Lifida B, Menor y Mayor di Aruba. Carl a jega di titula campeon di Aruba na masha hopi ocasion cu U-13, U-15, U-17, U-20. Ainda por corda tempo ora cu Carl a realisa su soño di hunga su prome wega den Hoofdklas, e dia ey e no por a drumi di contento.
Segun tempo tabata pasando Carl tabata crese y cada biaha e ta den e 18nan pa defende e escudo di Britannia. Den hoofdklas Carl a titula campeon di Aruba na 2 ocasion y varios biaha sub-campeon y Copa Betico na 5 ocasion.
Tur clase di exito pa Carl den futuro.
