ORANJESTAD (AAN): Den un entrevista cu referee internacional di Muay Thai di Aruba Devon Hodge, DIARIO por a comprende cu Muay Thai
a bira un deporte aproba pa ta un deporte pa olimpico pero lo participa den olimpiada di 2024 na Paris e biaha aki como un demostracion y na 2026 lo ta participando como un deporte extra den e olimpiada.
Nan ta hopi contento cu esaki pasobra atletanan di Aruba lo duna un bon representacion, mirando tur loke nan a logra internacionalmente den e ultimo 7 aña. E atletanan aki a crece masha hopi mes den e deporte di arte marcial y den Muay Thai sigur.
Nan ta preparando cu diferente training y lo bay diferente evento pa asina mantene e nivel halto. Den ultimo tempo paisnan grandi tin hopi exigencia pa atletanan di afo, pero nos atletanan ta dunando bon bataya y sacando cara di nos pais.
E ta spera cu atletanan di Aruba haya apoyo necesario pa motibo cu nan ta trata duro y train hopi duro pa logra sobresali den deporte.
Grupo di referee tambe ta bay cursonan pa asina tin e nivel pa ora yega momento pa olimpiada nan tambe lo por participa como referee. Den e Olimpiada aki, e gruponan cu a wordo invita pa bay Paris sigur lo haci un bon trabao pa asina na 2026 esaki por bira algo grandi pa e deporte.
Un palabra di danki na e Bond di Muay Thai Aruba y duna nan confiansa na nos como referee pa sigui cu nos trabounan y danki na e presidente nobo Ruthmila Gonzalez cu ta trahando duro pa e bond.
