Minister di Deporte:
ORANJESTAD (AAN): Durante Conferencia di Prensa di Gobierno di Aruba, dia 8 di mei 2023, Minister Endy Croes a indica cu despues di varios aña, pista di BMX di Streetwide ta den funcionamento bek.
Recientemente a haci e pista completamente limpi, pa esnan cu ta haci e deporte di “bicycle motocross” (BMX) por practica bek despues di varios aña. Pa motibo cu e parke no tabata hayando mantencion, el bay hopi atras te hasta bira mondi.
Minister Endy Croes a indica cu a traves di Lotto pa Deporte a aloca fondo pa haci e parke limpi, rosa e tereno y drecha e pista bek. Tambe, a palabra cu e organisacion cu nan lo percura pa un parti di e proyecto y ta bay organisa competencia pa recauda fondo pa termina di drecha e parke. Jaburibari tambe tin un pista di BMX y esaki tabata e unico cu tabata activo den e ultimo añanan aki. Ta planificando un careda di BMX internacional pa e luna di september proximo riba e pista na Jaburibari. Pa bin na remarke pa un careda internacional di BMX, e pista di BMX situa na Parke Curazon mester wordo ilumina.
Riba e veld di Parke Curazon ta bin 6 poste di luz di 18 meter halto pa ilumina e pista debidamente. A haci pedido caba di e postenan y lo ta yegando den e luna di juli pa instala. Tambe, Minister Croes a papia brevemente di e veldnan di futbol. Ministerio di Deporte conhuntamente cu Arubaanse Voetbal Bond (AVB) a cuminsa cu e proyecto poste di luz y luz di LED pa e clubnan di futbol. A cuminsa cu Veld di Unistars, Veld di Santa Fe, Veld di Brazil y Veld di Simeon Antonio.
Banda di esaki, e mandatario a indica cu gobierno anterior no a inverti placa di Lotto pa Deporte den loke tabata mester. Pues, e luznan di Veld di Nadi Croes/Crismo Angela a bin abou y a drecha esaki y actualmente ta den funcion. A mantene y verf e dugouts. Alabes den luna di mei e compania di yerbe artificial tabata na Aruba pa drecha e “batting box” area y rond di e basenan cu mester cambia e yerbe pa uno nobo. Tambe tin un compania cu ta terminando arkitectura pa un “signage” grandi banda di caminda cu nomber di e stadion aki.
Finalmente, Minister Endy Croes ta expresa cu a ehecuta varios proyecto caba pa deporte en general di Aruba y tin varios proyecto cu ainda ta den proceso. Cu disciplina, dedicacion y determinacion ta logra.
