Despues di tres aña por U5 y U7 a desaroya den un torneo grandi

ORANJESTAD (AAN)-  Diasabra ultimo tabata final di e torneo di futbol U5 y U7 di Arubaanse Voetbal Bond (AVB). E torneo a dura 8 siman largo. Harvey Clement, competitieleider di AVB,

a splica cu esaki tabata un idea inicialmente cu a bin door di e president di Arubaanse Voetbal Bond, ing. Richard Dijkhoff, cu tabata mira e potencial pa den e categorianan aki crea e posibilidad pa tur mucha hunga y toch no mas den e direccion competitivo. 

Despues di tres aña por bisa cu el a desaroya riba su mes hopi y bira grandi. Por nota cu tanto e mayornan como e muchanan tabata masha contento. Clement a enfatisa cu tin mas contacto cu e bala. E muchanan tin hopi mas gana di ta riba veld, na luga cu e tabata competencia cu esunnan miho so tabata hunga.

Despues di tres aña por bisa cu U5 y U7 a desaroya den un torneo hopi grandi. Por a mira e cantidad di mayornan presente con e muchanan ta interactua, tanto cu e otro ekipo como tambe e bala y esey ta e idea. 

Asina un biaha mas a yega na un final di un U6 y U7 hopi exitoso. Cu esaki ta habri porta pa mas torneo pa e otro categorianan. Ya a cuminsa prepara pa e campeonato nobo den e mesun formato aki. Esey lo bay papie cu e comision y for di eynan prepara pa e temporada nobo y percura pa loke ta mas importante pa e muchanan desaroya, drenta den contacto cu e bala y stima e deporte. Harvey Clement, den nomber di directiva di ABV a gradici cada un coach, lider, boluntario, cu ta dedica tur diasabra mainta na e muchanan aki, y asina hunto ta haci e cosnan aki grandi. 

Un comienso lento

Lider di Estrella, Marelien Boekhoudt, lider di Estrella categoria U7, a conta cu nan a cuminsa cu un grupo chikito. Na comienso e tabata tiki dificil, pero despues e acogida a bira grandi. Hopi mas mucha tabatin interes den e team y awo, nan a cera casi dos team pa wega. E muchanan gusta masha hopi. Boekhoudt a menciona tur cos ta bayendo hopi bon y ta contento con e team a crece. Nan tabata un team cu tabata hopi chikito. El a menciona di ta hopi contento y orguyoso di e muchanan y con e team ta creciendo dia pa dia. 

E weganan pa loke ta e campeonato diasabra a bay hopi bon. Por mira cu hopi di e muchanan cu ta bayendo U-9, con hopi nan a desaroya y con bon nan ta hunga cu otro. Kier mira sigur con nan lo sigui den U9. Esunnan cu t’ey awo den U7 tambe ta bayendo bon, tumando ehempel di e muchanan den U9. 

Estrella en general ta bayendo bon, segun Boekhoudt. El a gradici AVB pa por a organisa e festival pa e muchanan. Nan ta gusta y ansioso pa participa den diferente weganan cu a tuma luga riba diasabra. Por ultimo Boekhoudt a menciona pa sigui cu e bon trabao y sigui organisa e festivalnan aki.