Despues di 36 aña Rafael Vanegas ta despedi di e famia di RCA

ORANJESTAD (AAN): Su potretnan tabata sali den tur corant, den tur revista, y den entrevistanan na TV. Su epoca briyante di decada di 1980 y 1990 pa team di RCA,

a pone bira conoci como e futbolista cu ta garantiza goal ora cu tin wega. Rafael Vanegas, mihor conoci como ‘Rafa’, awor ta bandona e team cu el a keda fiel na dje, tanto como hungador valioso, y despues como coach di mucha- y hobennan.

   E ta bandonando Aruba pa bay residencia na Hulanda. Y prome cu esey socede, lo bay tin 2 dia di actividad na RCA Arena na Solito, cu ta uno caminda Rafa lo haci entrega di tur su trofeo y medayanan na e organizacion. E siguiente dia lo tin un actividad deportivo combina cu Festival di Cuminda pa yuda recauda fondo pa Rafa.

   Rafa mes como teenager a yega Aruba dia 25 December 1984. El a yega for di Colombia y a bin Aruba pa vakantie pa 1 luna. Su mama tabata biba den area di Santa Helenastraat, y a goza e dianan ey hunto cu su rumannan mas chikito.

   El a gusta Aruba hopi, y mesora a cera amistad den bario. Su mama a dicidi pa lage keda algun siman extra, y a busca extension na Inmigracion. Asina el a haya extension pa keda 3 luna. E momento ey e tabatin como 16 aña di edad, y como cu Rafa tabata interesa hopi di haya trabao, el a haya un puesto na Graficas Aruba danki na e propietario Calulu Comenencia. Awor tambe pues e tin 36 aña trahando eynan.

   Den Santa Helenastraat unda despues a bin Xavier University, tabata un tereno habri y aki tur atardi grupo di como 40 mucha ta hunga bala ariba abao. Tur atardi tin wega di bala y Rafa tambe ta hungando mey-mey di nan. Aki tabata Sr. Pacheco di Aruba Juniors, cu a pasa eybanda y a mira Rafa ta hunga. El a acerk’e y a bise pa bin un atardi pa hunga un wega pa Aruba Juniors. Rafa a bay hunga, pero como cu no tabatin mucho hungador, e wega a cay y nan a perde 7-2. Esaki no a cay den bon tera cerca Rafa y e no a regresa Aruba Juniors mas.

   Pero diripiente Ramon Pimienta cu ta biba eybanda, a mire y a puntra Rafa, pakico e no ta bay pa RCA? Pasobra RCA ta bon. E ora ta Pimienta mes a trece Rafa pa 5:30 pm na tereno di RCA pa un try-out. E momento ey Hoofdklasse tabata train, y tabatin 30 hungador presente, y tur tabata riba nivel.

   Rafa a mira asina hopi hende, y el a pensa cu e lo no haya hamas chens di hunga, pero riba insistencia di Ramon Pimienta, coachnan a laga Rafa subi tereno pa un try-out. Nan a keda asombra pa e habilidad di Rafa, y di eynan el a keda pa semper RCA.

   E hungador Joy Rosa cu tabata retirando di e team (debi na lesion serio na rudia), a mira Rafa y el a comenta na e coachnan cu e ta opina cu Rafa ta un hungador ideal pa reemplaze. Asina RCA a yama Rafa y a lage hunga 2 wega di Junioren. Despues di a mire actua riba veld cu Junioren, a dicidi cu ta sake di eynan, y a pushe mesora pa hunga Hoofdklasse.

   Den su prome wega di Hoofdklasse, Rafa di apenas 17 aña a anota su prome goal y mesora RCA a mira den dje, cu nan tin un hungador estelar aki. Tur bala cu e demas hungadornan pasa pa Rafa, nan sa cu e lo mande pa goal. E specialidad di Rafa tabata anota goal cu cabez, y esey e tabata haci hopi.

   El a planta respet cu e uniform #9 y a keda fiel tambe na RCA. E trato cu RCA a duna Rafael, tabata uno comodo pa e sinti su mes na cas.

   Rafa a hunga bao di varios entrenador, e.o. Feki Caster, Hareld Farro, Nolly Backer, Win Helder, Willy Croes, Johnny Douglas, y Herbert Beeldsnijder.

   Hungando pa RCA, na 1986 nan a bira Campeon di Aruba y Rafa tabata top-scorer cu 19 goal pa e campeonato. El a bira tambe Mihor Hungador di Aña pa e Gala Sport Show di Harold de Miranda. Na 1987 nan a bira Campeon di Aruba, y el a anota 17 goal. Na 1988 e tabata Top-Scorer di Campeonato di AVB cu 22 goal. Na 1989 tabata Campeon Li-Prof ‘Copa Aruba’. Na 1990 tabata Campeon Invicto di Li-Prof y como topscorer cu 25 goal. Aki el a bay Hulanda pa un tryout di 2 luna cu team FC Cambuur.

Na 1991 e team a bira Campeon di Aruba. Na 1993 a bira Sub-Campeon di Aruba. Na 1995-95 tabata Campeon di Aruba. Na 2002 a bira Campeon di Aruba.

   El a keda 17 aña ta hunga bala pa RCA, y a forma parti di Seleccion di Aruba na numeroso ocasion. E cantidad di goalnan cu el a anota den Hoofdklasse ta numeroso, pues Rafa a laga un stempel atras.

Despues di hunga, el a keda yuda 16 aña largo como Coach di team di Lifida y hubenil. E teamnan cu el a maneha, a produci hopi campeonato, y cada biaha e wowonan di Coach Rafa tabata briya ora di mira e Trofeo den man.

   Rafael Vanegas posteriormente a sigui curso pa Referee, y asina el a bira Referee tambe pa Futbol di Aruba, y eynan tambe a contribui grandemente na deporte di e isla.

   Como Coach, na 2006 su team a bira Campeon Division Mini-Baby. Na 2007 a bira Campeon Invicto Division Mini-Baby. Na 2008 a bira Campeon Division Mini-Baby. Na 2009 a bira Campeon Division Mini-Baby. Na 2010 y 2011 a bira Campeon Division Baby. Na 2011 a gana Torneo Copa Franklyn Bareño. Na 2011-2012 a bira Campeon Division Baby. Na 2012-2013 a bira Sub-Campeon Baby, Campeon Copa Buchi Morillo, Campeon Copa Don Elias Mansur, y Sub-Campeon Copa Betico.

A bira Sub-Campeon Div. Baby 2015. Tambe Campeon Lifida-B na 2016, Campeon Sub-13 na 2017, Campeon 2018. Sub-Campeon U15 na 2019. Campeon U-17 pa 2020-2021.

   Pero awor, e ta drenta un otro fase di su bida, y ta bay biba na Hulanda cu su famia.

   Diabierna siman pasa, Comision Rafael Vanegas a organiza un actividad, unda oficialmente el a entrega tur trofeo, medaya, clipping di corant, potret, y mas na RCA pa esaki bay den archivo.

   RCA semper tabata e di dos cas di Rafa, y el a splica cu awor cu e ta retirando, e lo bay haya falta hopi mes di RCA Arena na Solito.

   DIARIO Deportivo ta desea tambe Rafa, tur clase di exito pa futuro. Tambe hopi danki pa e cooperacion semper duna na DIARIO pa cu mundo di deporte, y sigur RCA lo bay haya bo falta.