William Erasmus, director interino IBiSA:
ORANJESTAD (AAN)—Señor William Erasmus, director interino di IBiSA, den conferencia di prensa a señala cu nan tin tres pilar importante, cu ta sostene nan deporte escolar:
- Esaki ta inculca Movecion y Salud cu cual nan ta move pone mas di 5 mil mucha move.
- E parti di duna e muchanan e oportunidad di experiencia e aspecto di competencia.
- Awo cu e weganan interinsular y e CONCECADE, cu ta bay tin aworaki na November, ta duna e muchanan e oportunidad di competi na un nivel un tiki mas halto, internacionalmente.
“Asina nan ta bay mehora y despues Aruba ta bay wak e frutonan di e muchanan aki cu un tiki mas experiencia den e parti di competencianan internacional”, Erasmus a subraya.
El a agrega cu despues di e weganan 2024-2025 nan tabata tin evaluacion y hunto cu e otro islanan nan a dicidi di agrega mas deporte, locual aworaki tin 11 deporte den weganan internacional pa e muchanan cu ta bay participa den deporte escolar, tin mas oportunidad pa nan por participa y competi na Bonaire, Curacao y Aruba. “Kiermen, di nuebe nos a subi pa 11 deporte, y mas cu claro tambe e ta subi e nivel pasobra nos tin otro islanan cu tambe ta participando; nos tin St. Maarten, St. Eustatius, SABA, y e aña aki tambe Suriname tambe a uni den e parti aki. Esaki ta hisa e nivel di competencia, ta haci’e mas agradabel, y mas interesante pa e muchanan por participa”, Willy Erasmus a acentua.
