Den competencia na Barbados atletanan a bin Aruba cu medayanan di oro, plata y brons

Aruba Aquatics Federation hopi orguyoso:

ORANJESTAD (AAN) – Sharissa Kock-Croes, Tesorero di “Aruba Aquatics Federation” a duna DIARIO informacion tocante e logro di ocho atleta local, cu a bay competi na Barbados, recientemente, unda siete a sali for di Aruba y Greta Schwangle a join e grupo na Merca.

Nan a bay participa den e campeonato mas grandi cu tin den Caribe cu ta CAREFTA. Tabata tin cuater dia di competencia y for di e prome dia e team di Aruba a logra medayanan di plata, e durante e siguiente dianan nan a scucha e Himno di Aruba, kiermen e atletanan a logra hopi medaya, pa un pais chikito. A competi 19 pais, unda Aruba a sali den bon lugar. Nan a logra di bin Aruba cu medaya di oro, plata y brons. E grupo aki ta bay sigui entrena, pa na final di Juni of Juli nan ta bay participa na un competencia na Trinidad & Tobago. Tin tres atleta cu ta cay bao di Comite Olimpico Arubano, cu a sali pa Rosario, Argentina, Diadomingo cu a pasa.

Di parti di e coach di e Seleccion di Aruba, Tayrin de Kort, cu a bay Barbados cu 18 team. Aruba a sali na di diez lugar, y a gana 3 medaya di oro, 3 di plata y 3 di brons, ademas di un mas di “open water”. El a menciona cu e despues di e pandemia e nivel di e atletanan a keda hopi halto, y el a haci e remarca cu Aruba su tecnica ta hopi bon, y e ta hopi contento cu esey. El a subraya cu tur e atletanan di Aruba a haci un bon papel, tabata tin un bon mehoracion y nan ta preparando pa e siguiente caredanan cu tin.

Di parti di Randy Arends, Presidente di Aruba Aquatics Federation, el a mustra con orguyoso ta cu e team di Aruba a bay Barbados, y nan ta hopi contento cu e resultadonan logra. El a expresa palabranan di felicitacion pa e coachnan, e muchanan (atleta) y tambe el a bisa cu nan ta hopi gradici cu e mayornan cu ta e motor tras di e muchanan, y cu ta aporta financieramente, pa e muchanan aki por participa na e tipo di competencianan aki. Finalmente el a desea e 3 atletanan cu a sali pa Argentina hopi exito y ta spera cu aya nan tambe haci un tremendo papel.

Hopi pabien di parti di DIARIO pa e tremendo logro aki.