Curso di coachnan duna pa US Soccer a sigui awor riba veld  

ORANJESTAD (AAN): Manera cu DIARIO a trece dilanti, e siman aki ta tumando lugar na Aruba un crash-course hopi importante den mundo di futbol. 

US Soccer Education a manda dos experto pa duna curso na coachnan di e.o. ekipo SV RCA di Aruba, e ekipo SV Flamingo di Bonaire, y SV Victory Boys di Curaçao.

   Esaki ta prome bes cu US Soccer Education ta haci un curso manera esaki den Caribe. E curso aki lo bay ta 5 dia intensivo pa e coachnan, y ta wordo duna pa Kostas Hatzikoutelis, y Mario Garcia Carvajal.

   Riba di dos dia, a duna mainta parti di teoria, y atardi a sigui cu les di practica riba veld.  E tabata un otro dia fructifero pa e coachnan.  Pa Aruba, e curso aki ta yuda e team di RCA crea un fundeshi mas solido pa futuro, unda desaroyo di muchanan ta primordial.

   E curso aki ta e prome paso pa drenta den e ‘Professional Coaching Pathway” di US Soccer. Tur licencia di US Soccer ta reconoci pa Concacaf y FIFA, y ta marca un paso significante pa desaroyo di entrenadornan di futbol riba Islanan ABC.  E curso aki cu normalmente ta dura 6 luna, a ser adapta specialmente pa e islanan ABC, y asina duna e 26 coachnan cu a registra e chens pa completa esaki den un periodo mas cortico.