ORANJESTAD (AAN): SV Royal Power Tat Fat hunto cu Heineken lo ta organisador di Copa Noord 2025 cual lo inicia diabierna 16 di Mei proximo riba veld di Kudawecha.
Copa Noord ta un di e torneo nan di mas popular cu a inicia desde anja 1979 y tin pues alrededor di 46 aña di existencia. Desde aña 2020 cu Covid 19 azota henter mundo Copa Noord no a wordo organisa mas y ta resumi bek e aña aki den gran forma.
Copa Noord 2025 dedica 4 Baluarte
Manera custumber ta honra esnan cu pa añanan largo a brinda nan contribucion na deporte y na Copa Noord den cualkier forma un reconocemento como aprecio y gratitud pa tur lokual nan a hasi pa deporte. Den 2025 lo dedica Copa Noord na 4 baluarte entre otro Johannes Poy Flanegin, Alvaro Barrios, Nel Frank y Francis Arcaya. Deportistanan cu trayectoria largo y exitoso den Copa Noord, den softball y deporte en general. Cu orguyo y placer nan lo wordo reconoci diabierna awor gradiciendo cada un di nan pa nan valioso aporte.
Gran apertura lo ta Diabierna 16 di Mei
Diabierna 16 di mei pa 7.15 pm e gran desfile y apertura di Copa Noord lo tuma lugar riba veld di Kudawecha. Un total di 8 equipo lo bay ta presente pa desfile y despues tira “lot” pa nos por aprecia e promer wega oficial di Copa Noord 2025. Calabas Blue Jays, Kudawecha Redskins, Kudawecha Indians, Royal Power, Salbabo, Super Plus, Bad Boys y Stingers lo ta e 8 equiponan cu lo bataya te final. Jerrino Bas & Friends hunto cu un DJ lo bay ta na veld pa pone ambiente.
Copa Noord 2025 lo bay ta grandi iniciando 16 di mei y lo termina diadomingo 15 di Juni. Amantennan di softball Copa Noord ta bek y e tey pa keda. Prepara pa bin apoya Bo equipo preferi. Copa Noord 2025 a la carga!!!
