William Erasmus, director interino IBiSA:
ORANJESTAD (AAN) Señor William Erasmus, director interino di IBiSA, a sigui bisa den conferencia di prensa, den cuadro di deporte escolar den e periodo 2015-2026 y weganan interinsular, cu CONCECADE (Consejo Centroamericano y del Caribe del Deporte), ta un impacto grandi pa futuro di nos deportistanan tambe, pasobra e ta un nivel un tiki mas halto. “Nos ta bay den Latinoamerica, cual nos ta bay tin mas competencia.
E aña aki e Minister a logra pa crea un fondo cu nos por bay cu cinco deporte. Pero esaki ta djis un stap cu nos ta haci pa inicia e proceso aki, mirando cu nos tin hopi aña sin participa den esaki”, Erasmus a relata. El a agrega cu pa 2027 por bay cu mas deporte, ya cu esaki ta tuma lugar cada dos aña.
“Kiermen, esaki ta algo hopi importante pa nos, mirando cu nos producto di deporte escolar a crece, y e ta bayendo den un direccion tremendo. Mi kier finaliza, eigenlijk, dunando un danki un biaha mas na e scolnan, nos docentenan, coordinadornan di deporte, stakeholders, p’a traha dia tras dia p’asina duna oportunidad na e muchanan di scol y hobennan na Aruba, p’asina experiencia esaki na diferente manera y diferente nivel”, William Erasmus, director interino di IBiSA a señala.
“Mas cu claro nos ta cla pa e temporada nobo 2025-2026, cu mas oportunidad, mas deporte, pa e muchanan aki sinti orguyoso y pa nos sinti orguyoso di nan tambe”, Erasmus a conclui.
