Comite Olimpico di Aruba a gana premio di Panam Sports Award

“Comite Olimpico di Best Performance”

ORANJESTAD (AAN): E ta algo cu sigur ta worde admira pa tur hende, ora cu un isla chikito den Caribe ta bin cu logronan den competencianan internacional.

   Hecho ta cu den fin di siman, Comite Olimpico di Aruba a worde reconoci como e “Comite Olimpico di Mihor Rendimento” (Best Performance), den categoria di poblacion di menos cu 1 miyon habitante.

   Esaki a tuma lugar durante e Panam Sports Award.  E evento aki teni Diasabra anochi na Miami (Florida), tabata e di dos edicion di Premionan aki cu a ser teni pa celebra e logronan destaca di atleta, trainer, y Comitenan Olimpico di henter continente Americano den Weganan Panamericanos Santiago 2023.

   E tabata un anochi di gala na Miami, unda den e ceremonia aki a conta cu ademas di dirigentenan deportivo, cu mas di 70 deportista di e 41 paisnan miembro di Panam Sports.

   E premio aki a bay pa e isla, danki na votonan, y nan ta yama Aruba como un ehemplo inspirador pasobra aki bo ta mira loke pasion y trabao duro por logra pa e isla aki.

   Wanda Broeksema kende ta president di Comite Olimpico di Aruba a ricibi e galardon riba escenario, den presencia di Nicole Hoevertsz (Secretaria di Comite Olimpico Aruba) y tambe e atletanan Rob Timmermans, y Ethan Westera.

   E maestro di ceremonia a acerca Ethan Westera pa puntre kico nan ta sinti.  El a bisa cu e galardon aki ta significa hopi, pasobra pa hopi aña e atletanan di Aruba ta tratando di ta den nivel halto di deporte cu nos ta awor, y Aruba ta felis cu e aña aki tin nivel halto di hopi atletico, y nos ta feliz y henter Aruba ta contento cu esaki, y ta prome biaha ta haya esaki.

   Sigur un momento di orguyo cu Comite Olimpico Arubano a ricibi e galardon Panam Sports Awards 2023 como e delegacion mas a sobresali durante e Weganan Panamericano Santiago 2023.  Esaki ta e reconocimento mas grandi cu e deporte di Aruba yega di haya den su historia. E 3 medayanan Panamericano tabata un prestacion simplemente di otro mundo y awe nos atletanan, Comite Olimpico Arubano ta worde reconoci internacionalmente pa esaki.  Un palabra di pabien na Aruba completo cu e premio aki.