Comite Olimpico Arubano ta reuni Aruba Aquatics Federation pa Artistic Swimming

ORANJESTAD (AAN): Diahuebs ultimo a continua cu e reunionnan cu e diferente federacionnan miembro pa cu e proceso tecnico-deportivo.

Den e caso aki, e departamento tecnico di Comite Olimpico (COA) cu ta Direccion di Deporte (DdD) a reuni cu e federacion di deporte acuatico, Aruba Aquatics Federation (AAF). Como e federacion ta conta cu diferente disciplina, ta haci un separacion unda ta trata cada un riba su mes.

Durante e reunion aki, a trata e deporte di Natacion Artistico. Sigur un deporte bon conoci, unda nos atletanan local ta destaca, cu varios medaya na nivel mundial di atleta Kyra Hoevertsz, un tremendo presentacion di e duet di Xiana Hoo y Kendra Simon na ASU2025 y un total di 7 medaya gana na e ultimo Weganan Centramericano y di Caribe SanSalvador2023.

Entrenadora Kimberly Vinck a presenta e plan di entrenamento pa 2026, unda ta preparando un ekipo cu ta desea di participa na e Weganan Centramericano y di Caribe SantoDomingo2026, cu lo tuma luga den luna di juli binidero.

A conta kico tur ta haci pa asina haci e preparacion necesario den e parti tecnico, tactico y fisico pa asina eleva e nivel actual di e grupo hoben cu ta den pleno preparacion. Hunto cu Kimberly,  tabata presente miembro di e comision tecnico sra. Alva Torres Gomez cu ta bon conoci den e mundo di Natacion Artistico.

COA ta gradici AAF pa e presentacion y ta deseanan hopi éxito cu e preparacion. #TEAMARU #COA #ARUBA