Comite Olimpico Arubano satisfecho cu exitoso ‘Capacity Building Training’

ORANJESTAD (AAN): Despues di 10 siman di les riba tur diamars, a clausura recien e curso di “Capacity Building Training” cu

a ser organisa door di e Direccion di Desaroyo di Comite Olimpico Arubano bou di guia di Sr. Patrick Werleman y Anastasia van Daal.

   DIARIO a compronde cu e curso aki a wordo prepara specialmente pa capacita e dirigentenan di e federacionnan nacional, unda a elabora riba 7 tema importante pa tur aspecto di maneho di un federacion, unda a enfoca riba tayernan manera bon gobernansa, finanasas, marketing y mucho mas.

   Pa clausura e curso aki a hasi un anochi di clausura, unda cu e entre otro a gracidi tur orador cu a participa boluntariamente durante e 10 simannan aki, ofreciendo nan tempo y experticio, ademas di felicita tur dirigente deportivo cu a participa, otorgando un certificado di participacion.

   Comite Olimpico Arubano ta felicita tur esnan cu a participa den e curso aki y ta conta cu e uso di e conocimento aki pa asina eleva e nivel di nan federacion nacional.