E tardanzanan enorme pa por inscribi na Censo ta hasta afecta deporte
ORANJESTAD (AAN): E siman aki, AVB a confirma cu nan Comision di Apelacion a yega na un decision referente casonan di SV La Fama, SV Sporting, SV Brazil Juniors y e Comision di Protesta y Conflicto.
E decision oficial a wordo publica riba 14 di juli 2026. Nan tin di aclara, cu e decision di Beroepscommissie ta “bindend voor alle partijen”, cu ta nifica; esaki ta e decision final y mester wordo respeta door di tur hende envolvi.
Aki DIARIO ta reproduci e decision final di e caso, cual rapport a wordo firma door di Benedicto de Cuba (vice-President) y mr. Ellen Kuster (Secretario).
Motibo pakico a apela: SV La Fama a apela pa tres motibo pa cual nan no ta di acuerdo cu e decision tuma door di Comision di Protesta y Conficto:
(*) Segun SV La Fama e hungadornan Rovien Ostiana (nr. 7), Marouan Berramdane (no. 11) y Jaysen Beukering (no. 6) ta speelgerechtigd door cu nan cada un tin un carnet di AVB pa hunga cual a wordo otorga a base di e regla di dispensation cu AVB ta maneha.
(*) Segun SV La Fama e hungador Abdelatif Taleb (no.2) ta speelgerechtigd door cu den articulo 3 di e Strafbepalingen ta papia di 'uitsluiting' di 1 partido official pero no ta wordo specifica di cual partido oficial esaki ta trata, si ta e wega cu ta sigi of si ta e di dos wega cu ta sigui etc. etc. Taleb no a hunga den e wega contra SV Britania, a sinta e partido ey y pues segun SV La Fama Abdelatif Taleb (no.2) ta speelgerechtigd. Locual segun S. V. La Fama tambe ta importante e pregunta si SV Dakota a protesta contra e hecho cu Abdelatif Taleb (no.2) a hunga mirando cu segun e informacion cu SV La Fama a ricibi, e protesta di SV Dakota ta solamente contra e tres hungador nan Rovien Ostiana (nr. 7), Marouan Berramdane (no. 11) y Jaysen Beukering (no. 6).
(*) E presidente di SV La Fama, sr. Andy Thijsen dia 23 di Juni 2026 a puntra e president di AVB, sr. Randolf Lade, con ta para cu e situacion di hungadornan cu tin caarchi geel den e fase final prome cu nan drenta play off. Aki sr. Randolf Ladle lo a declara cu tur carchi geel ta cancela ora drenta e play off.
Hechonan: E cuater hungador di SV La Fama cu ta Rovien Ostiana (nr. 7), Marouan Berramdane (no. 11) y Jaysen Beukering (no. 6) y Abdelatif Taleb (no.2) a hunga durante e partido cu a tuma lugar dia 10 di Juni 2026 entre SV La Fama y SV Dakota. E wega a caba den un empate di 1 -1. Riba dia 15 di Juni 2026 SV Dakota a entrega un protesta fecha 12 di Juni 2026 na AVB unda cu nan ta argumenta cu SV La Fama durante e partido di 10 di Juni 2026 lo a husa tres (3) hungador cu no ta gerechtigd como cu nan no ta cumpli cu articulo 52 di HHR. Tambe cu Abedatif Taleb (no. 2) a hunga cu un castigo di tres carchi geel acumula.
Tumando na cuenta cu: (1) E peticion di apelacion a wordo entrega na tempo. (2). SV La Fama a paga e gastonan di apelacion cu ta 450 Florin. (3). Comision di Apelacion a repasa tur e documento nan ricibi y e articulo nan relevante pa cu e apelacion adhunto. 4. Presidente di SV La Fama sr. Andy Thijsen, voorzitter di SV La Fama, sr. Ady Thijsen y e General teammanager di SV La Fama, sra. Fida Abdel-Hamid van Rojano, a wordo scucha dia 7 di Juli 2026 door di Comision di Apelacion.
(5) Presidente di AVB sr. Randolf Lade a wordo scucha dia 11 di Juli 2026 door di Comision di Apelacion. (6) Articulo 52 di e HHR ta regarda e requisito nan pa por participa na un wega di AVB. Bou di punto nan a to cu g di inciso 1 di articulo 52 HHR ta wordo menciona kiko un hungador ta obliga pa cumpli cu n'e pa e por bira speelgerechtigd. Por ehempel articulo 52 incisio 1 bao g ta exigi cu e hungador mester di un carnet otorga door di AVB.
(7). Den e carta di Comision di Apelecion fecha 30 di Mei 2026, riba e pregunta di voorzitter di AVB den e carta di 28 di Mei 2026 tocante e dispensasion temporal di articulo 52 inciso 1 sub d bou i di e HHR, Comision di Apelacion ta indica na AVB cu inciso 1 sub d di articulo 52 HHR ta redacta pa hungadornan cu no tin un paspoort Hulandes. Pues e requisito di inciso 1 sub d bou di i, pa entrega un comprobante di residencia di Censo (Bevolking) no mas bieuw cu 30 dia, ta un di e rekesitonan pa un hungador cu no tin un paspoort Hulandes por bira speelgerechtigd.
(8). Comision di Apelacion a indica na AVB cu awor cu tin un situacion special pa cu e comprobante di residencia (lesa: uittreksel di Censo) mester wak tur hecho y circumstancia cu por ta relevante pa determina e residencia, entre otro pero no limita na esaki, si e persona a saca su mes di e registro civiel na su pais, si e persona a purba inscribi su mes den e registro civiel di Aruba etc. (9). E dispensacion temporal di AVB di inciso 1 sub d, bou i, di articulo 52 HHR tambe ta toca hungadornan cu no ta biba na Aruba pero cu tin un paspoort Hulandes pa e simpel motibo cu nan, na nan turno, mester entrega un comprobante di residensia di Bevolkingsregister pa haya e Carnet cu ta prescirbi den articulo 52 inciso 1 sub g y sin e carnet aki aunque tur otro requisito ta na lugar, un hungador no ta cumpli cu articulo 52 HHR inciso 1 y pues no ta speelgerechtigd. Den nan caso pues e di tin di haber cu e Carnet y no ta un prueba di tin un permiso di Dimas.
(10). Den e carta di Comision di Apelacion ta wordo indica cu si den pasado AVB semper a laga of a permiti hungador nan cu no ta biba na Aruba participa den play-offs door di cu net prome cu esaki nan ta inscribi den registro civiel y ora e play off pasa nan ta kita nan mes di registro civil, e club nan mester por confia riba e hecho cu AVB no por sin mas cambia nan maneho pues e maneho di AVB den pasado sercano pa cu otro club nan tambe ta relevante. Aki mester menciona cu den e play off 2025/2026 tabata tin un otro team cu a hasi use di e maneho di AVB y cu SV Dakota na su turno tambe a jega hasi huso di e maneho aki.
(11). E tres hungador nan di SV La Fama a saca nan mes for di e registro civiel di nan cuidad na Hulanda pero no por a inscribi nan mes den e registro civiel na Aruba door di e problema cu tin na Bevolking unda cu AVB mediante e dispensasion entre otro a otorga un carnet na tur tres hungador pa cual motibo Rovien Ostiana (nr. 7), Marouan Berramdane (no. 11) y Jaysen Beukering (no. 6) a cumpli cu articulo 52 inciso 1 HHR y tabata speelgerechtigd dia 10 di juni 2026.
(12). Durante e weganan official di Round 2 Division di Honor Liga Oro, cual nan a tuma lugar respectivamente dia 23 di April 2026, 2 mei 2026 y 23 di mei 2026 e hungador di SV La Fama, Abedatif Taleb (no. 2), a haya un carchi geel pues na final di Round 2 Division di Honor Liga Oro Abedatif Taleb (no. 2) tabata tin tres carchi geel accumula. (13). Segun articulo 3 di e Strafbepalingen di AVB, pa un hungador cu haya un carchi geel den tres wega oficial organisa door di AVB e straf ta `uitsluiting' (suspension) di un (1) wega oficial. Un di e 'Algemene beginselen" den e Strafbepalingen cu ta wordo menciona den articulo 1 inciso 4 di Strafbepalingen ta, cu 'uitsluiting' mester wordo entendi como un prohibicion pa partisipa na un of mas wega oficial. (14). Den articulo 17 inciso 2 di e Strafbepalingen ta wordo stipula cu en caso un 'uitsluiting' no por wordo completamente ehecuta den e mesun campeonato of competencia, e sobra castigo lo pasa pa e proximo campionato of competencia. Pues, den e caso di Abedatif Taleb (no. 2) unda cu su di tres carchi geel den Round dos Division Honor Liga Oro a wordo duna den e ultimo partido den e round aki, Abedatif Taleb (no. 2) mester a sinta e prome wega den play off dia 30 di Mei 2026.
(15). Segun sr. Andy Thijsen e decision pa laga Abedatif Taleb (no. 2) hunga den play off tabata basa riba un conversacion cu sr. Randolf Lade presidente di AVB unda riba sr. Andy Thijsen su pregunta kiko ta pasa cu e carchi geel nan acumula den Round 2 Division di Honor Liga Oro ora cu bai play off sr. Randolf Lade a contesta cu esaki nan no ta conta mas den play off. Tambe cu esaki a wordo confirma door di e schema cu SV La Fama a ricibi for di sra. Editha Lake di AVB. (16). Abedatif Taleb (no. 2) a hunga e prome y e di dos wega di play off cual nan a tuma lugar respectivamente dia 30 di Mei 2026 contra SV Sporting y dia 10 di Juni 2026 contra SV Dakota. (17). Despues di e wega contra SV Dakota cu a tuma lugar riba dia 10 di Juni 2026, SV La Fama a haya sa di un posibel protesta di part; di SV Dakota y a dicidi pa no laga Abedatif Taleb (no. 2) hunga e di tres wega di e play off cu a tuma lugar dia 15 di juni 2026 pa asina cumpli en caso cu Abedatif Taleb (no. 2) tin un `uitsluiting' conforme articulo 3 di e Strafbepalingen.
(18). Standaard AVB ta aplica como regla cu ora un competencia pasa pa un otro Fase, e carchi geelnan cu ta acumula ta caduca. Pero segun articulo 17 inciso 2 di e Strafbepalingen, un `uitsluiting' a base di articulo 3 di e Strafbepalingen cu no por wordo ehecuta of wordo ehecuta completo ta keda vigente. Pues, den e caso di Abedatif Taleb (no. 2) aunque cu Abedatif Taleb (no. 2) a drenta e play off sin carchi geel, Abedatif Taleb (no. 2) mester a cumpli cu su castigo den e Fase nobo cu ta play off y pues tabata ongerechtigd pa hunga no solamente riba dia 30 di Mei 2026 pero tambe riba dia 10 di Juni 2026. (19). No tin duda cu SV La fama ta na haltura cu en caso cu tin un 'uitsluiting' esaki mester wordo sinta den e proximo wega conforme articulo 1 y 17 di e Strafbepaling. No solamente paso SV La Fama a dicidi di laga Abedatif Taleb (no. 2) sinta ora a scucha di un posibel protesta di SV Dakota pero tambe paso den e competencia Division Honor Rond 1, tres hungador di SV La Fama cu a sera un acumulacion di tres carchi geel a sinta castigo e sigiente wega.
A dicidi: (1). E hungadornan di S.V. La Fama Rovien Ostiana (nr. 7), Marouan Berramdane (no. 11) y Jaysen Beukering (no. 6) tawata speelgerechtigd pa participa den e competencia di dia 10 di Juni 2026 contra S.V. Dakota.
(2). E hungador di S.V. La Fama Abedatif Taleb (no. 2), a hunga den e prome dos wega nan di play off cual a tuma lugar respectivamente riba 30 di Mei 2026 contra S.V. Sporting y dia 10 di Juni 2026 contra S.V. Dakota mientras cu Abedatif Taleb (no. 2) tabata tin un 'uitsluiting' y tabata prohibi pa hunga conforme articulo 1 jo. 3 jo. 17 di e Strafbepalingen.
(3). Ta revoca e decision di Comision di Protesta y Conflicto di dia 24 di Juni 2026 encuanto e protesta di S.V. Dakota vs. S.V. La Fama.
(4). Ta dicidi cu S.V. La Fama tin rason den su apelacion di 3 di Juli 2026 (AVB #510-26) referente su tres hungadornan Rovien Ostiana (nr. 7), Marouan Berramdane (no. 11) y Jaysen Beukering (no. 6) unda cu tur tres ta speelgerechtigd.
(5). Ta dicidi cu S.V. La Fama no tin rason den su apelacion di 3 di Juli 2026 (AVB #510-26) referente su hungador Abedatif Taleb (no. 2). S.V. La Fama a participa den un campeonato official di AVB (play off) cu un hungador cu tabata tin un 'uitsluiting' y pues tabata prohibi pa hunga conforme articulo 1 jo. 3 jo. 17 Strafbepalingen y conforme articulo 12 di e RCW S.V. La Fama ta perde e wega 2-0. 6. Gastonan pa tratamento di e caso aki ta 450 Florin pa cuenta di S.V. La Fama.
