COA a tene su ultimo sesion di Capacity Building Training

ORANJESTAD (AAN):  Diamars siman pasa a tuma luga e ultimo les di e Capacity Building Training di Comite Olimpico Arubano, cu a ser organisa door di e Direccion di Desaroyo.

            A pesar cu e curso a conclui november ultimo, a keda falta un sesion pa presenta pa motibo di cancelacion paso un situacion imprevisto. No obstante e cambio y e conclusion final di e curso, mester bisa cu e varios federacion a mira e  importancia di e contenido di e curso y a atende esaki.

            E tema di e ultimo sesion tabata “Reimaginando Federacionnan”, cu a ser presenta pa e oradornan Drs. Marushka Tromp,  Secretaria General di UNESCO Aruba, y Stephanie Croes, fundador di Edu-Campus y “Emerging Communities Foundation”.

             E sesion aki tabata hopi dinamico, encurashando e participantenan pa ta hopi activo. Cada federacion por a identifica e puntonan importante di e topiconan cu a ser elabora durante e sesion, manera “Design Thinking” y “Touch Points”.

            Na final, durante e sesion di “feedback”, por a mira cu tur presente ta compronde e importancia di mira pa futuro, como parti di maneho y desaroyo di deporte na Aruba.

            COA ta gradici e oradonan pa e tremendo presentacion. E  participantenan na e sesion a informa COA di kier mas curso den futuro cercano pa asina por sigui desaroya e capacidad y maneho di e federacionnan y dirigentenan.