Club RCA a busca tres hungador di Colombia pa reforza nan team

Profesionalnan riba veld na Aruba

ORANJESTAD (AAN): Durante un conferencia di prensa convoca na RCA Arena na Solito, a toca honor na president Jeff Lopez di e organizacion deportivo aki, pa mustra cu durante 2024, nan ta bay ta celebrando e di 90 Aña di existencia di Racing Club Aruba.

   Y como cu pronto tin Copa Don Elias Mansur 2024, como tambe e competencia regional di teamnan campeon Caribense, esta 2024 CFU Club Shield na Curaçao, y tambe e Campeonato di Aruba cu lo start pa e season nobo, e organizacion na Solito a dicidi na busca 3 refuerzo cu a busca for di Colombia.

   (1) Lopez asina a introduci Jose Alberto Mondragon Mina, defensa central di 30 aña naci na Colombia, kende a hunga pa Deportivo Cali.

   (2) A busca Kevin Salazar Torres, un medio campista di 25 aña naci na Colombia kende a hunga profesional pa Herrera Fútbol Club, di e Liga Panameña de Futbol (LPF).

   (3) Tambe a busca Juan David Mosorongo, un medio campista di 26 aña naci na Colombia, kende a hunga pa team di Deportivo Cali.

   Jeff Lopez a bisa cu di e forma aki, RCA lo ta bon prepara pa tur e torneonan nan dilanti.  Cu e tres refuerzonan aki, nan ta cla pa bay Club Shield, y tambe campeonato nobo.  Nan meta ta pa trece e Club Shield pa Aruba, y cu e meta tambe pa bin bek cu e copa di Campeon di Aruba bek pa RCA Arena.

   Despues di esey, Lopez a haci entrega di uniform nobo na e tres refuerzonan aki.

   Aki por mira con sigur tur club di futbol ta trata na eleva nan mes, y treciendo tres refuerzo di Colombia, lo bay eleva e mesun hungadornan di RCA tambe, y e tres hungadornan aki mes tambe tabatin deseo pa a bin hunga pa RCA.  Esaki sigur lo eleva e ekipo y animo di tur hende.

   Riba e potret por mira d.r.p.d. Jose Alberto Mondragon Mina, Kevin Salazar Torres, y Juan David Mosorongo cu lo ta awor riba veld como un tricolor.