Club di RCA a dicidi bin bek cu Copa Don Elias Mansur 2024

E torneo aki lo ta durante luna di Juli

ORANJESTAD (AAN): Durante un conferencia di prensa convoca na RCA Arena na Solito, a toca honor na president Jeff Lopez di e organizacion deportivo aki, pa mustra cu durante 2024, nan ta bay ta celebrando e di 90 Aña di existencia di Racing Club Aruba.

   E organizacion di RCA a bin cu e bon noticia, cu despues di basta aña cu e evento no ta ser teni mas, pero awor si pa 2024 ta bay resucita y trece bek e asina yama “Copa Don Elias Mansur 2024”.  Por corda cu antes esaki tabata conoci como ‘Copa Richmond”.

   E historia di e Copa aki ta bay bek atras na 25 aña.  E sosten di e competencia aki semper tabata wordo sosteni pa e comerciante Serge Mansur, y pa esaki RCA ta hopi agradecido na dje.

   Lopez a splica cu e Copa Don Elias Mansur aki semper tabata wordo ‘usa’ como un pre-campeonato pa clubnan cu ta participando, por ‘test’ nan hungadornan.  Esaki lo ta prome cu e tempo di transfer-window permiti pa AVB, pero lo tin reglanan pa cu esaki.

   Milly Henriquez di RCA ta esun cu ta coordinando e Copa Don Elias Mansur aki, y el a splica cu esaki lo bay tuma lugar den e periodo for di Diahuebs 4 di Juli 2024 te cu Diadomingo 14 di Juli 2024, na RCA Arena mes.  Premionan lo ta igual manera antes, esta ganador ta bay cu 1.500 Florin, di dos lugar ta bay cu 500 Florin.  Lo bay tin un sistema nobo di loting cu ta Diabierna 28 di Juni na club mes, y asina lo bay saca dos poule di 4 team cada uno.  Pues e Copa aki lo tin 8 team total participando aden.

   Segun Henriquez, ya caba invitacionnan a wordo manda y ta sinti cu interes ta grandi cerca clubnan local, como cu e torneo aki di berdad ta fungi como un ‘preparacion’ prome cu e temporada di campeonato di AVB bolbe start.

   Tur cuatro team di poule lo hunga, y e dosnan cu tin mas punto, lo sigui pa e cross-final, cu posteriormente ta desemboca den e gran final, y tambe wega pa determina di 3er y di 4to lugar.

   Como cu e weganan aki ta tuma lugar casi den e transfer-window di AVB, e ora reglanan introduci ta mustra cu hungadornan local tin di presenta nan carnet, y esnan cu ta den e transfer-window y cu a pidi nan retiro di club anterior, mester tin esaki firma di nan club anterior y cu e stempel di AVB, pa por hunga den Copa Don Elias Mansur.  Hungadornan no-local tin di presenta prueba di peticion haci na Dimas, y esey ta suficiente pa nan por hunga y participa cu e ekipo di nan futuro, pero por hunga solamente cu 1 team den henter e Torneo.

   Copa Don Elias Mansur 2024 ta un chens unico pa cada team participante, mira con nan hungadornan, pa mira con leu nan por yega cu nan tactica, y con e dinamica di team ta riba tereno di bala.

  Lopez a splica cu e team di RCA lo haci uso di e torneo aki tambe como preparacion pa nan participacion otro luna na Curaçao, den e asina yama ‘2024 CFU Club Shield’.  E ta e di siete edicion di e competencia di teamnan di futbol cu a sobresali den region di Caribe, y cualnan ta afilia cu e Caribbean Football Union (CFU), cu ta un sub-confederacion di CONCACAF.

   Como cu RCA a bira campeon di Aruba aña pasa nan ta participando na e Club Shield aki, dia 25 di Juli na Curaçao.  E biaha aki Club Shield ta den Round of 16, cu ta un fase di knock-out.  Aruba lo enfrenta e team profesional di Arnett Gardens cu ta campeon di National Premier League di Jamaica.  Aruba di awor caba ta bon prepara, y tin hopi interes di trece e Club Shield pa Aruba.