Canada na un forma duro a dal y gana Aruba cu score di 7-0

BRADENTON: E team fuerte di Canada a ataca sin fin e oncena di Aruba riba Diasabra anochi, na IMG Soccer Academy Stadium na Bradenton (Florida), pa derota e team local cu score di 7-0. 

    E wega di e team Canades tabata duro, cu precision tabata scop bala, y constantemente ta pasa e bala pa otro, y semper tin e delanteronan cla dilanti goal en espera di un bala.

    E wega di Diasabra anochi, tabata e clasificatorio di CONCACAF pa e Mundial di Qatar 2022.  For di momento cu referee a fluit comienzo di e partido, por a nota cu Canada su team a bin enbusca di victoria, y e presion a start inmediatamente.  E team di Aruba a purba su best pa mantene esaki bao control, y den e prome 15 minuut mas o menos e tabata algo cu tur hende a hala rosea.  Sinembargo na di 17 minuut e prome goal a cay pa Canada, y algun rato despues e di dos goal.  Aki ya caba por a mira cu e Canadesnan tin un futbol bon coordina y di caliber halto.

   Y ta comosifuera cu e resto di wega a djis tuma lugar dilanti e palonan di goal di Aruba so.  E team di Canada no tabata laga Aruba haya ni un chens pa core leu cu e bala pa purba na yega otro banda, y inmediatamente tabata kita esaki y bay bek cu velocidad halto riba e goal cune.

   Den halftime, Canada tabata gana cu score di 3-0.  Den di segundo mitar a bin cu mes hopi presion y na final e score a keda na 7-0 pa Canada.

   Goalnan di Canada a wordo anota pa Lucas Cavallini (17 minuut, 45 minuut), Junior Hoilett (20 minuut), Zachary Brault-Guillard (49 minuut), Alphonso Davies (78 minuut), Cyle Larin (87 minuut), Jonathan David (89 minuut).

   Algo di nota ta cu e hungador Ronald Gomez di Aruba, a hunga su ultimo wega internacional tambe representando su isla.  Tabata na aña 2002 cu Ronald a cuminza hunga wega internacional contra team di Suriname.  Tur e añanan ey el a sigui participa den seleccion di Aruba pa competencianan internacional.  Awor 19 aña despues el a anuncia e fin di su carera internacional.   Ronald Gomez na Aruba ta hunga pa team di RCA.

   Finalmente e standing den Grupo-B di CONCACAF, prome lugar awor ta Canada cu 9 punto, sigui pa Suriname na di dos lugar cu 9 punto, cu Bermuda na di tres lugar cu 3 punto, y Aruba na di cuatro lugar cu 3 punto.  Cayman Islands ta na di cinco lugar cu 0 punto.  Potretnan ta pa cortesia Soccer Canada y OneSoccer.