ORANJESTAD (AAN): E trabaonan cu directiva y miembronan di Camacuri Harley Davidson Club ta haciendo pa algun siman,
ta cuminsa bay awor den cinco speed unavez cu Carnaval a finalisa.
Pasobra nan lo tin nan evento grandi yama ‘27th Annual Flag Rally 2024” cu ta draai rond di celebracion di Dia di Himno y Bandera na Aruba. Y nan lo bay tin participante di exterior presente riba e isla tambe.
DIARIO a compronde cu ya caba riba Diaranson 13 di Maart 2024, e container cu e Bikes cu a bin di exterior ta wordo habri na Fast Delivery pa asina e participantenan di exterior por bay busca nan propiedad.
E siguiente anochi, esta Diahuebs 14 di Maart lo bay tin e Anochi di Registro na e cocktail lounge Baru na Palm Beach, for di 6:30 pm te cu 11:30 pm.
Diabierna anochi dia 15 di Maart, nan lo tin e ‘Brotherhood Support Ride’ cu lo sali 8:00 pm for di Parke Turismo na Linear Park.
Diasabra anochi dia 16 di Maart, nan lo tin e ‘Devoted & Commited Surprise Ride’ cu lo sali pa 8:00 pm for di Hooters Family Restaurant na South Beach Center.
Diadomingo 17 di Maart pa 6:00 pm, nan lo tin e ‘Sundown & Bike Challenge Ride’ saliendo for di Eagle Beach.
E dia grandi mes, esta Dialuna 18 di Maart, e ‘27th Aruba Flag Rally’ lo cuminza pa 11:30 am for di Balashi Garden. Ey nan lo bay core rond di Aruba riba e isla su dia nacional.
Finalmente riba Diamars 19 di Maart, tur esnan di exterior lo bay tey na Fast Delivery pa pone nan Bikes bek den container pa hiba bek pa nan pais natal.
Na comienso di luna di Maart, lo bay tin mas detaye di e celebracion grandi aki di Camacuri HD Club.
