Biking Squad Aruba a cumpli su prome aña di existencia dia 31 di October ultimo.

ORANJESTAD(AAN): Biking Squad Aruba dia 31 di October a cumpli su prome aña di existencia y esaki a wordo celebra recientemente.

Biking Squad Aruba a wordo Funda door di Rubert Paesch, Yina Maduro-Viatela, Nathaly Da Costa kende a bin cu e nomber y Frans Tromp, kende a traha e logo.

E cuater miembronan nan aki a cuminsa core cu un bon intencion sigur cu conseho di docter, mirando cu tabata tin algun di nan cu tabata tin algun problema di salud.

Paesch a splica DIARIO cu nan a wordo conseha pa cuminsa hasi algun movecion y pesey a opta pa cuminsa core bicicleta.

Poco poco e team a cuminsa crece entre famia y amistadnan  y actualmente e team ta consisti di 37 miembro.

 Biking Squad Aruba ta consisti di miembronan Dama y Cabayero di diferente categoria manera Beginner, Elite y mucho mas.

 E grupo a participa y competi den algun careda aki na Aruba caminda e team a sobresali sigur cu premio den e diferente categoria nan. 

E meta di Biking Squad ta pa yuda un y tur den e deporte aki y den futuro haci obranan caritativo. 

Pa celebra e prome aña di existencia, Biking Squad a hasi un recorido y nan invitado special tabata e team di Parceros Trial. 

“Biking Squad ta enfatisa y hasi un peticion special na tur coredo pa sigui core, train duro y keda semper safe ariba caminda”, segun Paesch.