Betto Roga como baluarte di deporte a haya reconocemento

ORANJESTAD (AAN): Algun dia pasa, Minister Endy Croes tabata presente na Barcadera pa un ocasion hopi special unda a duna reconocemento y homenahe na sr. Alberto ‘Betto’ Roga.

   Den un ambiente festivo memey di famia, amistadnan, ex–hungadonan di baseball y Minister Endy Croes a dedica e anochi special aki na honor di sr. Alberto ‘Betto’ Roga kende tin un trayectorio impresionante den e mundo di baseball cu hopi titulonan di campeon cu entre otro ekipo di Aruba Rotary. Sr. Roga tin tambe un enorme dedicacion como boluntario y a dedica su bida pa educa hobennan hunga baseball.

   Den presencia di su esposa, yiunan, amistadnan y ex hungadonan di baseball e mandatario di deporte a haci entrega di e reconocemento di ‘Baluarte di Deporte’ na e legendario sr. Betto Roga. Minister di Enseñansa y Deporte Endy Croes ta gradici Betto pa su dedicacion y aporte den deporte di baseball na Aruba.

   Minister Endy Croes a hiba un excelente discurso cu bunita palabranan bon escogi dedica na sr Roga y a gradici famianan pa e invitacion y bunita recepcion alavez ta duna palabra di gradicimento y pabien na su esposa y yiunan kendenan semper a sostene sr. Betto Roga aña aden y aña afo. Danki Betto pa bo tremendo aporte incondicional na deporte.  Danki na tur esnan cu a organiza e tremendo anochi aki.