Bautiso uniform nobo di SV Britannia

ORANJESTAD (AAN): Siman pasa na Compleho Deportivo Franklyn Bareño,

den un Sala Mama Lica completamente yen a tuma lugar bautiso di e uniformnan nobo di Britannia.

   Prome cu e parti oficial di e bautiso a reconoce e diseñador di e uniform. E biaha aki a scohe un forma diferente pa yega na e diseño. A laga e hungadornan mes traha nan diseño. E huradonan tabata tin un tarea dificil pa scohe e diseño ganador, cual a keda den persona di Adam Boekhoudt.

   A base di e diseñonan ricibi a haya e inspiracion pa traha un diseño pa e fanaticada di Pumanan di Britannia, cual diseño a ser haci pa Matthew Boekhoudt. Durante e anochi aki a duna cada un un Jersey como recuerdo.

   Despues a sigui cu e parti oficial caminda cada division, hunto cu nan Sponsor y madrina a haci e bautiso.

   Tabata un anochi super exitoso caminda tur presente por a aprecia e trabao duro y esfuerzo grandi di famia Britannia y e disfruta di e cosecha di exito.

Presidente di Britannia, sr Cedric Werleman a enfatisa cu exito di Britannia no ta posibel sin e dedicacion di cada hungador, esfuerso di e coachnan, sosten di e lidernan, cooperacion di mayornan, apoyo di cada fanatico y confianza di e patrocinadornan.