Aurora "Rory" van Ulft ta forma parti di ekipo nacional di Aruba Amateur Weightlifting Association

ORANJESTAD (AAN): Aruba Amateur Weightlifting Association (AAWA) ta orguyoso di anuncia e incorporacion oficial di Aurora "Rory" van Ulft den su equipo nacional.

Cu apenas 13 aña, Rory ta trece cu ne un curiculo deportivo extraordinario cu ta pone e entre e hisadonan di peso mas talentoso di su generacion na nivel mundial.

Kende ta Rory?

Rory van Ulft, naci riba 5 di februari 2013, a descubri su amor pa e deporte di weightlifting na edad di 5 aña, despues cu su entrenamento inicial tabata enfoca riba desaroyo di forsa pa gimnasia. Su talento natural a bira evidente hopi lihe, y asina e deporte a converti su mes den un vocacion serio. Actualmente, Rory ta competi na nivel elite tanto den weightlifting y gimnasia nivel 7. Na mes momento, e ta balansa esaki cu su studio na John McCrae Secondary School (den e Programa di Atleta di Alto Rendimento) na Ottawa, Canada.

Dicon Rory kier representa Aruba

Primeramente Rory y su famia ta di descendencia Hulandes y tin paspoort Hulandes. Durante transcurso di ultimo añanan, Rory y su famia a crea lasonan fuerte cu pais Aruba y directiva di AAWA. Nan a apoye desde un comienso; e la entrena na Aruba, participa den un try-out y competi den nos campeonato nacional 2024 y 2025, unda cu e la sa di sobresali. Su deseo grandi ta pa representa Aruba den competencia internacional.

Un historial deportivo impresionante

Den su trayectoria corto, Rory a logra hazañanan cu e deporte di weightlifting no a yega di mira antes:

2x Campeon Nacional Hubenil di Aruba den Weightlifting (2024, 2025) na edad di 11 y 12 aña.

Campeon Nacional Hubenil di USA Weightlifting - e mas hoben den historia (2020, na edad di 7 aña y 302 dia)

Campeon Nacional Hubenil y Junior di Canada (2024 - 2026), representando Team Ontario

E persona mas hoben (homber of muher) cu a hisa 2x su propio peso corporal den competencia - 66 kg na un peso corporal di 32.8 kg (na edad di 9 aña y 350 dia)

Desde 2020, Rory ta invicto den competencia, dominando clasificacion di Sinclair y Q Points na evento nacional y provincial tanto na USA, Canada y Aruba.

Bista pa futuro

E mira di Rory ta cla: representa Aruba na Campeonato Mundial Hubenil di IWF 2026 na Cali, Colombia, y mas despues, clasifica pa Wega Olimpico di Los Angeles 2028 - e aña cu e lo cumpli 15 aña y lo por clasifica pa competencia internacional senior.

Bou di guia di su entrenador Spencer Moorman, Rory lo bay defende e bandera di Aruba cu e mesun determinacion cu e ta describi su atributo di mas importante: "Mi nunca ta rindi."

Palabranan di bonbini

E Aruba Amateur Weightlifting Association ta duna Rory van Ulft un bonbini caluroso den e famia deportivo Arubano y ta expresa nan confiansa cu e atleta excepcional aki lo trece resultadonan grandi pa nos isla.