ORANJESTAD (AAN): Aruba Tang Soo Do Federation y Gihae Tang Soo Do Studio kier felicita cordialmente su alumnonan cu a logra pasa nan examen exitosamente di Black Belt 1ste Dan y 2de Dan,
diasabra 8 di November 2025.
Alina van Oosten a pasa su examen pa Black Belt 2de Dan, hunto cu seis alumnonan cu a logra pasa nan examen pa Black Belt 1ste Dan: Nancy Kelly, Daphne van der Deure, Kylee Thomas, Ava Figaroa, Daniël Cabenda y Shantwan Kock.
E alumnonan a completa un examen di teoria y filosofia di Tang Soo Do, sigui pa un examen practico cu un duracion di 5 ora intensivo. Na final di e examen practico, cada participantenan tabata mester defende su scriptie, un parti esencial di e proceso pa Black Belt.
Aki 6 luna despues di un tempo di prueba e atletanan lo ricibi nan resultado y nan certificado y faha di nan examen.
Nan kier felicita di curason tur nos alumnonan pa nan tremendo esfuerso y disciplina riba vloer, y tambe nan mayor y famia cu semper ta sostene nan yiunan den e deporte di Tang Soo Do. Masha, masha pabien cu un logro asina grandi y a mustra e berdadero Spirito Indominabel di Tang Soo Do!
Tambe Gihae Tang Soo Do Studio ta gradici sinceramente su instructornan Sah Bum Nim Melissa Noguera, Bo Sah Bum Nim Aymon Kelly, y Bo Sah Bum Nim Rodney Thomas pa nan dedicacion y apoyo constante den e preparacion pa e examen aki, asina como tur e team di Black Belt cu a yuda durante e trainingnan y e examen mes.
