ORANJESTAD (AAN): Elliott Loonstra PLY hunto cu su coach Luciano Mazzeo a representa Aruba na e Campeonato Europeo di Para Taekwondo riba 30 di juni 2023 na Montargis Francia.
Aki el a enfrenta otro atleta Paralimpico, e Koreano Too Jeonghun (KOR) kende tabata e ganador di e pelea y tambe a termina siendo e campeon di e categoria.
Dos dia despues na Solidarity Center Para Taekwondo Open riba 2 di Juli 2023 Loonstra a enfrenta e Brasilero Claro Lopes. Venciendo e Brasilero, Lefty a keda pa enfrenta den e cuarto final e Mexicano Luis Mario Najera, kende na su turno a vence Loonstra pa solamente un punto di diferencia.
E siguiente dia nan a biaha pa Australia pa participa den tres competencia consecutivo sin por a sosega riba dianan 7, 8 y 9 di juli 2023. Esakinan tabata e ‘2023 Oceania Para Taekwondo Open Championships’, e ‘2023 Para WT President’s Cup’ y por ultimo e ‘2023 Oceania Para Australian Open’. Aunke Loonstra a logra yega podium den tur tres competencia, el a keda supera pa e Brasilero Claro Lopes den e tres semi-final unda Loonstra tabata tin un lesion di e competencianan cu a tuma lugar anteriormente na Francia.
Apesar di e lesion y e fatiga di biahe Elliott ‘Lefty’ Loonstra PLY a lucha pa Aruba y den haci esaki a demostra dicon e ta keda den e top 10 di ranking mundial pa e di dos aña consecutivo. Su posicion for di juli 2023 ta number 7. Oceania tabata e ultimo continente unda Elliott ‘Lefty’; Loonstra PLY mester a competi y representa Aruba.
Considerando cu 2023 ta e aña prome cu e weganan Paralimpico di Paris 2024, hopi pais ta disputando nan clasificacion directo pa e weganan cu na final di aña. Solamente e prome seis (6)
atletanan di e ranking mas halto lo haya un clasificacion directo. Esaki ta e meta final di Elliott Loosntra PLY y su coach Luciano Mazzeo.
Den e siguiente 5 lunanan Loonstra lo sigui lucha pa Aruba pa mehora su ranking mundial. E lo participa na e ‘Korea Open Para Taekwondo’ y e ‘Grand Prix di Francia’ na augustus na e ‘Mexico Grand Prix’ y e ‘World Para Taekwondo Championship’ na september, na e ‘China Grand Prix’ na october, na e ‘2023 Chile Para Pan American Games’ den november y e ultimo lo ta e ‘2023 England Grand Prix Finals’ na Inglaterra.
Ta manda un agradecimento hopi special na su mama Jenny, su tata Andre pa nan apoyo incondicional na nos atleta Paralimpico como tambe na e pueblo di Aruba.
