Aruba ta avansa den CONCACAF Nations League

ORANJESTAD (AAN): Seleccion Nacional di Aruba a completa fase di grupo di CONCACAF Nations League C y

a asegura su luga den League B pa e proximo edicion di CONCACAF Nations League.

   Aruba a termina fase di grupo cu tres victoria den cuatro partido. Aruba su Seleccion Nacional a gana 1-0 contra Antigua & Barbuda y a vence Anguilla dos biaha, cu resultado di 2-0 y 3-2. Apesar di e derota di 3-2 contra Antigua & Barbuda den e ultimo partido di Diamars anochi, Aruba a logra e resultado necesario pa sigui dilanti den CONCACAF Nations League.

   Cu esaki, Aruba a asegura su participacion den e League C Championship na Maart 2027, unda Aruba su Seleccion Nacional lo enfrenta Montserrat den semifinal.

   Pero prome cu esey, Aruba lo enfrenta Martinique den e League A & C Play-In na November. E Play-In lo consisti di dos partido, un na cas y un afo. Si Aruba logra gana Martinique na November, e Seleccion Nacional lo avansa pa Gold Cup Prelims na Juni 2027, unda Aruba lo tin e oportunidad di lucha pa un historico prome clasificacion pa CONCACAF Gold Cup.

   Arubaanse Voetbal Bond ta felicita hungadonan di e Seleccion Nacional, cuerpo tecnico y staff pa nan dedicacion y compromiso durante e competencia. AVB ta gradici tambe tur fanaticonan y henter pueblo di Aruba pa e sosten na Aruba su Seleccion Nacional.