Presidente di Federacion di Muay Thai:
ORANJESTAD(AAN): Recientemente presidente di Muay Thai Aruba Ruthmila Gonzalez a indica cu e ta hopi contento cu e deporte di Muay Thai ta parti di e Weganan Olimpico di Paris.
El a splica cu e biaha aki como test ta apenas 5 pais ta participa, pero cu pa e Weganan Olimpico di 2028 tur e otro paisnan incluyendo Aruba por ta presente.
“Aruba ta cla pa esaki, mirando cu den e ultimo añanan Aruba su atletanan a haci un bon impacto den exterior y a gana hopi pelea importante”.
Esaki ta pone cu otro paisnan ta invita e bringadornan di Aruba constantemente, segun Gonzalez, kende a indica cu e atletanan di Aruba ta bon prepara y cu pa ora cu e Weganan Olimpico di 2028 tey, nan lo ta ainda mihor prepara pa haci un bon papel.
“E maestronan di Aruba ta haciendo un tremendo trabao yudando nos bringadornan mehora y ta bon prepara pa e retonan”.
Pesey mi ta gradici nan sigur y cu nan sigui guia e atletanan den e diferente torneo y campeonatonan na caminda, incluyendo na Boneiro, Mexico y akinan na Aruba mes, segun e presidente di Muay Thai.
El a gradici tambe e comision di Minster di Deporte Endy Croes cu a bin cu varios tip valioso.
