Aruba Chess Challenge 2023 a wordo clausura exitosamente

ORANJESTAD (AAN):  Diadomingo atardi na Hyatt Place Hotel a tuma lugar a ceremonia di clausura di Aruba Chess Challenge 2023.

Jose Andres 'Chelo' Pesqueira, Presidente di Asociacion di Ahedres di Aruba a duna di conoce cu a termina un excelente torneo cu a conta cu participacion di 9 pais y rond di 95 participante.

            El a agrega cu Aruba Chess Challenge ta un torneo cu ya caba tin 15 aña ta celebrando e. Nan ta spera di por sigui cu ne cu ayudo di nan sponsornan.

            Pesqueira a laga sa cu nan ta hopi satisfecho cu e evento. Un ke otro inconveniente por presenta, pero el a gradici cu tur cos a cana manera debe ser. Tabata tin un excelente participacion di e arbitronan y principalmente di e muchanan cu a comporta sublimemente bon.