Aruba Bank contento di por a patrocina uniform di futbol pa 297 Soccer Academy

ORANJESTAD (AAN):  Aruba Bank a patrocina uniformnan pa e ekipo local di futbol, 297 Soccer Academy cu e obhetivo pa yuda desaroya tecnicanan di futbol y habilidadnan mental.

            E ekipo di futbol ta consisti di muchanan entre 4-16 aña di edad cu ta participa activamente na training nan semanal dirigi pa coachnan professional cu ta traha hopi riba con pa mehora e tecnicanan di futbol di cada atleta y tambe yuda nan desaroya nan habilidadnan mental manera disciplina, con pa focus y con pa siña hunga den team.

            Aruba Bank ta contento un biaha mas di por yuda apoya e ekipo di futbol local cu tin como meta pa yuda nan crece como atletanan y como persona individual. E banco local tin como pensamento cu deporte por tin un impacto positivo den e bida di e muchanan y hobennan. Nos ta pensa cu tur mucha merece e oportunidad di por participa den deporte pa por desaroya nan habilidadnan y siña e importancia di forma parti di un ekipo.

            Aruba Bank ta spera di por inspira otro companianan y personan individual pa por inverti den e bienestar di nos muchanan y hobennan como tambe nos comunidad.