Aruba a derota Republica Dominicana 2-0 na Corsou y a titula campeon di Serie del Caribe

*Seleccion di Baseball di Aruba Little League despues di 13 aña ta bek den World Series 

ORANJESTAD  (AAN): Minister di Enseñansa y Deporte Endy Croes ta sumamente contento cu e actuacion y resultado di nos Seleccion di Aruba Little League edad 11-12 aña.  Aruba cu un “outstanding performance” den Serie Del Caribe, cual a tuma luga na Corsou.

            Diasabra atardi, Aruba a topa e fuerte ekipo di baseball di Republica Dominicana den e gran final. Aruba un dia anterior tabata perdi 6-0 den prome inning contra e fuerte Seleccion di Pariba di Corsou y a logra bringa pa gana e wega aki 12-8 tras di un tremendo home run di tres (3) careda di Arnold Martha cu a trece Aruba bek den wega.

            Diasabra anochi, den un stadion yen yen, Aruba ta derota Republica Dominicana 2-0 pa titula campeon di Serie Del Caribe. Pitcher Naivmar Angela ta tira un “one hitter” te den di 5 inning sin permiti careda, mientras e mes ta conecta un cuadrangular pa manda Aruba ariba 1-0 den e di dos entrada.

            Sigur un wega yena cu emocion, pero Aruba su seleccion a hunga cu caracter pa gana y a sa di ehecuta e momentonan mas crucial sea cu “double play” y hungadanan na momento oportuno.           Pabien na nos seleccion, pabien na e coaching staf y manager y tur cu a duna nan aporte.        Seleccion di Aruba awo ta bay sigui prepara pa augustus nan biaha pa Williamsport na Pennsylvania pa representa Caribe completo den e gran World Series.