Amigonan di Antillian Stars “Hulanda” a reuni y a hunga un wega contra otro cu a termina 15-15

Un sorpresa  agradabel pa Sr. Hubert Bomba

ORANJESTAD (AAN): Diasabra siman pasa masha hopi amigo kendenan di un of otro forma a hunga pa Antillian Stars na Hulanda of tabatin un conexion como fanatico pa cu Antillian Stars a reuni na veld di Madushi Stars den oranan di atardi y a hunga un wega contra otro. 

‘Antillian Stars Hulanda’:

            E ekipo aki a wordo funda den aña 1985 na Hulanda door di mayoria studiantenan di Aruba y Curaçao. Despues a dicidi di afilia na Federacion Hulandes pa competi den campeonatonan oficial. Esaki a crea un ambiente unda talentonan studiante di ambos isla tabata practica tur siman y hunga den weekend. Esaki a bira un atraccion pa demas studiantenan y hendenan di Aruba y Curaçao y mas despues hasta Hulandesnan cu tabata yega tereno pa mira weganan di Antillian Stars.

            Antillian Stars mesora a gana titulo den clase mas abou pero na e forma cu e tabata gana su weganan pa knockout Federacion Hulandes a dicidi pa promove Antillian Stars mesora te ‘hoofdklas’. Antillian Stars a causa furor y na 1990 a conkista su prome campeon di hoofdklas mientras e añanan siguiente 1991 te 1994 a mantene nan titulo tanto campeon di Hulanda y campeon di Europa. Den transcurso di 1985 pa 1995 mas o menos 10 aña. Masha hopi talentonan di Aruba y Curaçao a forma parti di dicho ekipo. Kisas hopi pa skirbi. 

Sr. Hubert Bomba a ricibi un homenage di sorpresa:

            Hubert Bomba un persona masha conoci na Hulanda den mundo di baseball y softball tanto como hungado y despues como coach/ manager a crea masha amistad cu nos talentonan studiante. Sr. Bomba kende tin masha hopi aña ta residencia na Hulanda. Sr. Bomba a pasa den un aña dificil unda recien a perde su casa Linda (q.e.p.d). Lloyd Wever y algun amigo a bin cu e idea pa nos sorpresa Hubert awor cu e ta na Aruba y mustre e aprecio cu masha hopi studiante y amigonan cu a hunga den Antillians Stars tin pe.

            Asina a invita tur esnan na Aruba cu a bisti uniform di Antillian Stars den nan tempo y hunto a hunga un wega contra otro entre nan cual a termina 15-15. Durante e evento entre amigo aki a pidi 1 minuut di silencio pa esnan cu a bay laga nos entre otro Linda Bomba- Ivan Peña- Stanley -Orlando Albus y Poentje Castro (kende fungi algun aña como presidente di e ekipo). 

Resultado di e wega:

            Den un tremendo wega unda por a aprecia hopi talentonan den edadnan awor ya mas grandi por a tuma nota di basta bataso. Poy Flanegin kende tin ‘Champion Pitcher’ di Hulanda y Europa riba su nomber a inicia e partido pa ekipo 1 y Clay Shipley a habri pa ekipo 2. Wega tabata estilo di ‘toma y dame’. Tula van Heyningen a releva Clay Shipley den ultimo inning. Ekipo 1 a rally pa 4 careda den ultimo entrada pa empata e wega 15-15 net na bahada di solo.

            Un bunita wega unda famianan a goza un mundo. Miho bateadornan pa ekipo 1 tabata Feliz Bijlhot 2-1, Tony Warner y Ricky Henriquez di 3-2, Joslyn Falcon di 4-4 incluyendo un triple y un double, Poy Flanegin y Win Dabian di 4-2, Hubert v/d Biezen y Kenki Bomba di 3-1 y Lloyd Wever a bay di 3-0. Pa ekipo 2 cu tabata dilanti te ultimo inning a destaca na plato Alfonso Steenen y Ingmar Ramharakh kendenan a bay di 3-2, Minister di Deporte Endy Croes a bati di 3-3 cu 4 RBI, Patrick “Tula” Van Heyningen di 3-3 incluyendo un homerun, Clay Shipley di 3-1, Freddy Bomba 3-2, Julfrain Bomba 3-1. Ekipo 1 tabatin 15 careda, 16 hit 3 error, y ekipo 2 tabatin 15 careda, 15 hit, 4 error. 

            Fanaticonan y mas hungadonan di Antillian Stars di Hulanda cu tabata presente manera Eddy y Anneke Dunlock, Juan Feliz, Frits Everon, Andree Pico Jansen, Alvin Kock, Rimbert Croes (Tsunami) x catcher di Antillian Stars, Jenny Geerman, Franny Rafael, Javier Ras, Robert Wever. Tin varios cu no por a logra yega pero e ekipo a anima y ta pensando caba riba un di dos encuentro. Hungadonan cu tambe a milita den transcurso di 10 aña den Antillian Stars cu no a logra yega ta Nunn Flanegin, De Flanegin, Rock Angela, Louis Boekhoudt, Arnold Peterson, Nelson Orman, Buchi Ridderstap, Mai Lopez, Rudy Dirksen, Lloyd Todman, Olav Starrenveld, Tico Jacobus, Wendel Paula, Henk van Zijtveld y Ronnie Gumbs pa nombra algun. Disculpa na demas nombernan cu por a wordo lubida.   Deporte a trece amigonan di mas di 30 aña bek hunto pa un bunita causa. Esaki ta forsa di deporte y su efecto pa crea ‘network’ y amistad.