Alina Mansur cu mas di 20 aña di dedicacion representando Aruba

ORANJESTAD (AAN): Alina Mansur ta un amazona cu un carera basta reconoci tanto na Aruba como internacionalmente.

Alina a inicia su prome stapnan den e mundo di ecuestre y durante e ultimo 20 añanan el a representa Aruba na diferente campeonato internacional entre otro Corsow, Colombia, Puerto Rico, Merca y su isla Aruba.

Alina a cosecha diferente logro. El a gana medalla di oro den e Mundial di Jinete y Amazonanan 2014 y medaya di Oro den e Mundial di Jinete y Amazonanan 2018.

Na 2018, el a inicia su participacion den e clase 'amateur' na Merca cu su cabay Tesoro di Villa Floralina.

For di e momento ey, Alina no a stop di logra titulonan grandi manera Gran Campeon ATR Asheville Alive 2018, Gran Campeon ATR Potros 4 aña PFHA Grand National Competition, Gran Campeon ATR Extravaganza International 2018, Gran Campeon Spectrum International 2020 y esun mas recien cual el a obtene e fin di siman cu a caba di pasa den e Extravaganza International 2021 den e categoria 109 Fino AM/Colts/Stallions NP, na Ocala, Florida.

Mester bisa cu Alina ya caba ta preparando pa participa den e campeonato Nacional di PFHA y e Mundial Confepaso 2021.

Masha pabien Alina y na henter team di Villa Floralina.