Algun legendario a haya reconocimento na Camacuri Harley Davidson Group

Un saludo cordial na mi amigonan di SPEEDWORLD, cu boso sirbidor Hubert ‘Furai’ Tiel.  Awe mi ta raporta riba un anochi special di honra miembronan distingui.

   Recientemente durante un actividad na e establecimento nobo net na cruzada di Schotlandstraat y caminda di Kibaima pa Pos Abao, a tuma lugar un Anochi di Reconocimento, organiza pa directiva y president di Camacuri Harley Group.

   E ambiente tabata fenomenal, y e anochi aki a rindi homenahe na algun miembro, cu a bira awor den categoria di “Legendario”.

   Esnan homenagea como Legendario awor ta Juni Kock, Candido Werleman, Maiky Croes, Alirio Wever, Ronny Cornelie, Joaquin Kelkboom, Tony Bosch, Ruben Yanez, Alberto Bareño, Dodo Farro, Fransisco ‘Chuple’ Sylvania, Glen Richardson, Milton Arends chikito, Jani Petrochi, y boso sirbidor Hubert Tiel.

   Algo special ta cu e anochi aki a instala 3 miembro nobo pa Camacuri Harley Davidson Club, y nan ta Gilburt Dijkhoff, Tico Danies, y Renny Conradus.