A honra leyenda di Jidokwan Taekwondo na Aruba esta Grand Master Len Johnson 

ORANJESTAD (AAN): Recientemente Chaco Taekwondo Academy (CTA) tabata e centro di encuentro unda nos a reuni cu gran honor y emocion pa celebra un icono di nos arte marcial.

   Den presencia di su esposa, amigonan y ex-alumnonan, nos a entrega e certificadonan oficial di 'The World Taekwondo Jidokwan Federation' na Grand Master Len Johnson.
   Un resumen breve di e trayectoria historico di GM Len Johnson:  El a nace dia 2 di September 1947, y el a cuminza train Taekwondo na Februari 1968 bao guia di Master Adolf Lichtenstein (alumno directo di GM Sihak Henry Cho di New York) den e prome dojang di Korean Karate na Aruba.

   Prome Generacion: E ta wordo reconoci como parte di e First Generation di faha preto di Aruba Karate Institute (A.K.I.).
   Promocion nan historico: A ricibi su 1st Dan na 1970 bao di Mr. Robert G. Zychski (manda pa GM Sihak Henry Cho), 2nd Dan na 1977, 3rd Dan na 1985, 4th Dan na 1997, y su 5th Dan na 2004 bao di A.K.I.

   Expansion internacional (1971): A bay studia na Enschede, Hulanda, unda el a habri e prome scol di A.K.I. Jidokwan na Hulanda.
   Impacto na Bonaire (1986): A muda pa biba na Bonaire unda tambe el a habri su scol pa sigui expande e arte marcial.
   Supervision: Awendia, A.K.I. ta keda bao di su supervision directo como Chief Instructor.

   E anochi aki na CTA tabata un momento unico unda e 'Old Timers' di Aruba Karate Institute a bin hunto pa reconoce un caballero di 79 aña cu a dedica su bida completo cu fidelidad na Jidokwan. Cu sosten di GM Sir Jose Cornelio y nos scol, nos a haci e peticion humilde na World Taekwondo Jidokwan Federation na Korea pa duna GM Len Johnson e reconocemento di 9th Dan cu e merece profundamente.

   Danki na tur cu a haci e anochi historico aki posibel y cu tabata presente pa comparti e momento inolvidabel aki!

   Riba potret por mira den rij patras Sam Dumfries, Kevin Hodge, Master Yoshmar Wever, Mireille Dirksz, John Dijkhof, Master Richard Vrolijk. 

   Den di dos rij tin Master Eric Barry, Antony Geerman, Emilio Geerman, Sensei Felix Tromp, Master Miguel Genser, GM Melvin Rasmijn.  E rij mas dilanti tin Master Eric Dania, GM Chaco Cornelio, GM Len Johnson y Esposa, Mario Genser, y Ricardo Perez.