Liberato Hoek, Hefe Servicio Ambulans:
ORANJESTAD (AAN)- Señor Liberato Hoek, Hefe di Servicio di Ambulance di ImSan, den entrevista cu Matutino DIARIO, na prome lugar a manda palabranan di pabien pa tur profesional den enfermeria cu ta traha na Aruba riba nan Dia di Enfermeria, y esnan na Hospital, na ImSan y na Ambulance.
El a indica tambe, cu otro siman di dia 17 pa 24 di Mei, ta wordo celebra e Siman di Ambulance, y Servicio di Ambulance mes lo celebra nan siman di dia 18 pa 24.
“Dia 18 mainta nos lo celebra cu un Santo Sacrificio di Misa na Misa Birgen di Fatima na Dakota, y Diahuebs nos tin un mini simposio pa e personal di Ambulance. Diadomingo lo cera cu un Barbecue pa e personal y riba Diasabra 23 nos tin un actividad specialmente pa nos muchanan. Aña pasa ya caba el a wordo haci na YMCA na Dakota, y e biaha aki nos lo trece pa Renaissance Convention Center”, señor Liberato Hoek a relata.
Señor Hoek a trece dilanti tambe, cu servicio di Ambulance ta bayendo bon, y actualmente nan tin seis verpleegster cu ta den opleiding cual ta caba na November, y e bon noticia ta cu na momento cu e grupo aki keda cla (actualmente nan tin 3 ambulance den cada warda) lo tin espacio pa cuater ambulance den cada warda.
“Eigenlijk, e ta miho pa nos servicio pa locual ta nos bezetting na e manera cu nos ambulancenan ta parti riba e isla”, señor Hoek a splica.
