Segun Parlamentario Evelyn Wever-Croes:
ORANJESTAD (AAN): Fraccion di MEP den Parlamento diahuebs mainta a bishita e proyecto nobo di Awss na Parkietenbos. Esaki ta trata di dos incinerator cu ba basta tempo caba Awss tabata trahando riba dje y awo a wordo poni den funcion. Parlamentario Evelyn Wever-Croes a expresa di ta contento cu e proyecto aki porfin a keda cla despues di un tardansa cu no tabata necesario di parti di gobierno actual cu a tranca e proceso door cu kier a investiga prome, mientras tabata tin hopi reto di medio ambiente.
Parlamentario Wever-Croes a menciona cu su gobierno a privatisa Awss na unda cu nan tawatin e vision aki y awe esaki a wordo ehecuta door di gobierno actual cu a sigui cu e vision di Gabinete Wever-Croes.
El a agrega cu Director di Utilities Aruba NV, Joseph Everon a pidi sosten di Parlamento. “Manera mi a bisa semper, nos ta sostene proyectonan cu ta bon pa Aruba, irespecto si nos ta den gobierno of oposicion, si e ta bon pa Aruba, manera e proyecto aki cu nos mes a traha riba su fundeshi, nos ta sosten’e”, Parlamentario Wever-Croes a remarca.
