ORANJESTAD (AAN): Aruba a habri bek e frontera cu Brazil. Esaki a pesar cu tin e variante di Brazil cual ta wordo considera uno peligroso.
E hustificacion di esaki segun Sharline Koolman, Crisis Team Leider y Hefe na Departamento di Malesanan Contagioso ta cu en berdad nan ta bezig ta monitor esaki, principalmente e ultimo siman.
El a bisa cu pa u haya e variante di Brazil, por ehempel, un persona no mester bin directamente for di Brazil. Colombia ta un di e paisnan cu tambe tin e variante aki hopi presente cerca nan.
Si tin habri e frontera cu Colombia y esun cu Brazil ta cera esaki ta algo cu no tin mucho logica ya cu e introduccion di e variante por sosode di un otro manera, for di un otro caminda, a splica.
Na Merca tambe tin e variante aki, pero no hopi presente. Na Reino Uni tin e variante di India ta tuma over. Por wak cu si ta cera e frontera un caminda, e ta drenta toch di otro banda.
Ta bezig ta evalua y ta flexibilisa pero si ta mira algo cu no ta bayendo bon y ta wak cu tin introduccion di variantenan tin motibo di introduci algun medida, cu no lo ta pa cera zomaar, pero lo por introduci hopi otro cos cu por haci, Sharline Koolman a indica.
Finalmente el a laga sa cu Crisis Team ta bezig ta wak Latinoamerica hopi di cerca. El a bisa cu segun ATA, e cantidad di personanan cu ta bin Aruba for di Brazil no ta asina halto. Esaki kiermen cu e cantidad di hende cu lo bin for di eynan no ta bay ta un cantidad cu lo por causa un problema grandi.
Tin cu mira for di unda e problema ta biniendo y unda ta mas grandi. Basa riba esey lo tuma un decision. E dianan aki tabata tin reunionnan caba riba e tema aki pa dicidi si ta manda un otro advies pa Crisis Team pa tuma un decision e siman aki.
Koolman a laga sa cu cosnan por cambia y si ta necesario cu mester bin otro medida lo tuma esaki manera a haci cada bes.
