Meneer Mathilda, director EPB San Nicolas:
ORANJESTAD (AAN) Den entrevista cu DIARIO, señor Gregory Mathilda, director di EPB San Nicolas, a menciona cu paden di scol e situacion di pelea ta hopi controlabel. Pero e dianan aki si tin problema y e mes no sa ken nan ta.
Hecho ta cu tin bringamento y esaki no ta aceptable mas, pasobra e ta birando un tiki mas agresivo y peligroso cu uzo di piedra, boter, cuchio. “Ningun area di Aruba, nos dushi tera, nos ta desea pa esey sosode. Aki banda nos ta na un dushi scol, nos ta educa y purba di drecha”.
Meneer Mathilda a señala cu tur hende akinan tin cu drenta comunidad laboral, y tin cantidad di trabao na Aruba y educacion ta bira esencial. E ta pidi pa ban respeta e area aki.
Mathilda a expresa cu danki Dios tin un bon contacto entre e scolnan na San Nicolas, y e ta hopi gradici di esey. E ta responsabilidad di scolnan pa tene trankilidad na parti paden, y como hende tur e alumnonan ta su yiunan. Unda cu e mucha ta biba sea na San Nicolas y vecindario como pabao di brug, e ta desea cu ora e mucha caba por yega cas trankilo cu e por sigui haci su les. El a bolbe pidi comunidad pa yuda y keda vigilante, mayornan cu ta yama scol, etc., e kier pa nan sigui haci esaki pasobra asina nan por lanta un hoben y nos sociedad.
Nota di redaccion: na añanan 90 Instituto Pedagogico di Aruba tabata enfatiza hopi riba e expresion cu tabata popular den seno di educacion, aki na Aruba: “Ta tuma un comunidad pa lanta un mucha”. Ta bal la pena pa bolbe tuma e slogan aki y trece diferente ehemplo, con un comunidad mester uni man pa lanta un mucha.
