Ta un pipita na rand di e klep abao di wowo
ORANJESTAD (AAN) Ademas di e griep pisa cu ta circulando na Aruba, tin otro andansa cu ta consisti di grawatamento den e rand di wowo y inflamacion na e klep abao di wowo, y ta causa molester pa e bista den e claridad.
E persona ta sinti un molester comosifuera tin algo straño ta hinca su wowo, y ora e bay wak den spiel, ta ripara cu tin un pipita cu a sali diripiente den e rand di klep abao di wowo, y berdad ta fastioso.
E no ta wowitis. E por haya alivio hinca un saco di te den awa un tiki lauw (no pa kima), y pone riba e wowo cera, pero e pipita no ta kita.
Dokter di Cas no por haci nada cu esey, pasobra e no ta mishi cu wowo di pashent, y specialistanan den nan mayoria ta cu vacacion, te cu despues di 4 di Januari.
Parce cu tira un par di drops di awa di Maraviya den awa lauw ta yuda alivia e grawatamento. Pero no ta aconsehable pa rasca of grawata e wowo, pa evita un infeccion.
Posiblemente e abces aki ta wordo ocasiona pa cambio ambiental, pasa di yobida pa calor intenso cada bez, pero tambe por ta debi na e polucion den medio ambiente.
