Wilhelminastraat pronto lo mira trabaonan di revitalisacion

Prome Minister Mike Eman

ORANJESTAD (AAN): Diamars mainta, Prome Minister Eman hunto cu Minister Wever y Minister Herdé a tene un conferencia di prensa den cual a comparti e bon noticia cu Wilhelminastraat pronto lo mira trabaonan di revitalisacion. Durante di e conferencia aki, a anuncia un destaho pa revitalisacion di Wilhelminastraat y vecindario.

E mainta aki, Prome Minister Eman a splica e motibo pa cual continuacion den gobernacion ta vital, pa evita cu esfuersonan pa proyectonan y visionnan grandi bay tira afo cu tur consecuencia.

Prome Minister a recorda con durante di su ultimo gobernacionnan, a logra trece institutonan renombra Aruba manera TNO, Rotterdamse Scheepvaartschool, Rietveld Academie y Philips cu e meta pa haci di Aruba un hub entre Hulanda y Sur America y region. Manera e gobierno nobo e tempo ey a sinta, structuralmente a core cu tur e institutonan aki. Prome Minister a elogia Minister Wever cu a pesar di tabata forma parti di e gabinete anterior cu a para e trabaonan di inversion den revitalisacion di Caya Grandi, Minister Wever si a persisti y mester a nabega contra di e coriente.

Madurez politico ta importante si kier mira progreso real na Aruba y esaki ta e base riba cual e programa di gobernacion di AVP-Futuro ta traha. E meta principal di e gobierno aki ta pa mehora e capacidad di compra di nos comunidad y hunto cu sector priva, por logra mas di esaki y e renobacion di centro di ciudad y di nos barionan ta esencial pa e bienestar general di nos hendenan.

Recien a anuncia e renobacion di e barionan di Bushiri, Mabon y De Vuyst, creando barionan completo den cual cada habitante lo por biba cu dignidad real y yuda forma nos comunidad. Ademas tin 60 miyon aloca caba pa den 2026 yuda mehora e poder di compra di nos hendenan vulnerabel.

Cosnan grandi ta na caminda y gobierno lo duna e sosten necesario pa por percura pa esakinan cana eficientemente.