Sentencia den Caso Avestruz
ORANJESTAD (AAN): Riba Diahuebs, Partido Red Democratico a reflexiona riba e Sentencia di Huez den e investigacion grandi di Caso Avestruz rond di ex-Ministro Benny Sevinger.
Ricardo Croes di RED a bisa cu cada rato Huez tabata repasa cada caso individual y ta blo menciona “circunstancianan sospechoso”, y cu no tin suficiente prueba pa yega na un conclusion cu e acto a ser cometi.
Pero na e momento aki tin un sentencia, y e ta un berguenza pa pais Aruba. Un berguenza cu un ex-Ministro, actual Parlamentario ta wordo sentencia na 1 aña di castigo pa tur loke e ta wordo haya culpable di dje, y e otronan cu no por a comete e fechoria, a haya mas castigo cu e propio ex-Ministro.
RED ta spera cu lo bay pa Corte Superior, y aki Hueznan lo sa di wak si de facto e trabao cu Ministerio Publico a haci merece loke e Huez a sentencia na Aruba.
Sorprendi pa e celebracion: Tambe Ricardo Croes a keda sorprendi, cu tabatin un celebracion grandi na Cas di Partido AVP, comosifuera cu e sentencia di culpabilidad tabata “algo pa celebra”.
Ora cu un ex Mandatario ta wordo sentencia pa soborno, ta algo pa celebra! Y parti di pueblo di nan sostenedornan ta bay celebra cu nan tambe.
“Asina mi por corda e caso di Paul Croes tambe, cu den prome instancia ta tur hende ta para firme”, Ricardo Croes a bisa. Esey ta pasobra e sostenedornan tabata culpa Ministerio Publico, despues culpa ta fout di Corte, despues ta culpa supuestamente ta culpa di Hulanda, pasobra ‘obviamente nan no a haci nada’.
Pero awe Paul Croes, ex-Ministro di AVP ta sintando su castigo den KIA. Kende tabata fout? OM? Corte? Of señor Croes?
Den caso awor di Benny Sevinger, ta tumando lugar al mescos atrobe, cu un par di diferencia. Pa straño cu e por sona, cu tanto tempo di investigacion, Ministerio Publico a presenta un caso unda Huez a haya cu no tabatin suficiente indicacion, aunke tin yen di circunstancia sospechoso, toch no tin suficiente prueba pa sentencia Sevinger cu mas castigo.
Pero esey no ta kita cu tin un sentencia di castigo, y esey ta nada di celebra! Pasobra semper ta corda, cu unda tin huma tin candela. Y tur hende cu a sigui e caso, por mira y realiza cu tin suficiente indicacion cu cosnan incorecto, ilegal, contra tur norma di bon gobernacion, a tuma lugar. Esey ta e berdad!
