AVP pasando den lama bruto
ORANJESTAD (AAN): Tur cos ta mustra cu e sistema di haci politica den forma antiek, ta un gran estorbo pa asina futuro generacion por bin cu cambionan necesario pa pone e isla aki switch pa un forma diferente di maneho, di progreso, y cumpli cu tur trend global aworaki.
E sistema di mina otro politiconan pa propio beneficio, y despues keda sin divulga e berdad ta algo cu e politiconan di generacion nobo no ta acepta awendia mas! E epoca di ja-knikkers ta yegando su fin, y Aruba lo mester ta orguyoso si esey sigui socede.
Ta conoci cu friccion a cuminza di como un luna pasa caba ora cu e generacion nobo di politiconan den AVP, esta Ryçond Santos do Nascimento, y tambe Gerlien Croes a keda desapunta ora cu e zapatonan bieu di Partido Berde a cuminza zapatea.
Esaki a empeora ora cu Diabierna siman pasa, Huez a dicta sentencia den Caso Avestruz. Un caso serio cu ta mustra riba e lamentable actonan cu ta socede pa soborna un Ministro. Y hopi hende a keda sorprendi, cu e sentencia serio aki a wordo ‘celebra’ den Cas di Partido.
Mesora Ryçond Santos do Nascimiento a distancia su mes, ora a bin ripara cu Partij Bijeenkomst di AVP a tene reunion y vota pa sigui sostene Benny Sevinger di Caso Avestruz.
Que hubo di Gerlien Croes? Diahuebs mainta durante un conferencia di prensa, el a bin duna un declaracion despues di a haci evaluacion, y consulta cu mayoria di su sostenedornan riba loke ta pasando den e panorama politico aki.
Gerlien Croes a reuni cu prensa patras di edificio di Parlamento, y a bisa den linea grandi cu e ta desapunta, e ta desilusiona, y ta sinti su mes difama tambe. El a divulga na prensa, cu e mes como Parlamentario no a wordo avisa cu lo tin reunion di Partij Bijeenkomst. Toch el a percura pa presenta eynan y a bay sinta na mesa.
A ser bisa cu e reunion no a wordo yama, ni nada. Pero toch e hecho cu no a informa e mes como miembro di fraccion, ta un falta total di respet pe.
“Mi a sinta na e mesa eynan, y lagami bisa cu mi a sali for di e anochi ey hopi desilusiona, y mi a sintimi hopi humilia, pasobra mi no a spera cu den mi cas ora cu tin diferencia di pensamento of diferencia di opinion, cu bo por wordo trata asina aki,” Croes a indica.
El a bisa cu durante e Partij Bijeenkomst aki, e reunion a bay den direccion di insulto y difamacion di dje. E kier reitera cu desde el a drenta politica, e ta formando parti di AVP. No tin cambia cu lo cambi’e tampoco.
Pero toch ta sinti su mes defrauda pa e forma cu el a wordo trata. Y pa loke ta su siguiente pasonan, e lo bay consulta cu su sostenedornan pa mira ki paso lo bay tuma awor.
Gerlien Croes a bisa, cu loke e ta pidi aworaki ta un cambio real pa politica na Aruba. Esey nifica cambio den AVP? El a bisa cu esey ta keda na Partido mes pa dicidi.
Pero el a subraya cu Gerlien Croes NO a drenta den politica cu e aspiracion y meta pa lidera un partido. El a drenta politica como hoben cu su metanan pa haci un diferencia den e pais aki.
Croes a bisa cu Diaranzon e tabatin combersacion cu lider di Partido, y awor ta bay consulta cu su famia, cu su sostenedornan, pasobra e no a sinta cu tur ainda. Despues di esey e por tuma decisionnan of no.
Te cu Diahuebs atardi 5:00 pm, Gerlien Croes keto bay ta pertenece na AVP, y ta tambe miembro di fraccion di AVP den Staten.
