Partido Accion21 a introduci 3 candidato nobo

ORANJESTAD (AAN): Durante un conferencia di prensa, lider di partido Accion21, Miguel Mansur, a introduci 3 candidato nobo cu lo ta riba lista pa eleccion di dia

25 di Juni.

Diego Acevedo

Diego Acevedo a presenta su mes como un tata, un casa pa 16 aña y un homber di famia. E ta un profesional hoben, un ecologista y ta considera su mes un persona cu tin un vision di un mihor futuro pa Aruba. Un futuro sin un Dump na Parkietenbos, na unda hotel y casnan por tin acceso na un tecnologia mas eficiente pa baha gastonan halto di servicionan di utilidad na Aruba. El a conta cu el a nace y lanta na Colombia, pero cu su 18 aña el a dicidi di biaha rond di mundo y el a studia su Bachelor's den Mechanical Engineer na Merca, na unda el a desalinizacion di awa. Y su interes pa busca solucionnan innovativo pa retonan grandi di mundo a causa cu el a bishita diferente pais. Na Hulanda el a haya su Master den Sustainable Energy. Den ultimo 10 aña e ta trahando riba problemanan grandi manera awa, energia y desperdicio cu un vision di un economia circula.

Zoraida Conijn

Zoraida Conijn ta conoci como pa su activismo den derechonan di bestia, pero e no a uni na partido Accion21 solamente pa derechonan di bestia, sino pa combate maltrato cu ta tumando lugar na Aruba. El a scoge partido Accion21 pasobra nan ta dun'e e libertad pa expresa nan mesun ideanan, con nan ta wak loke Aruba mester. No ta solamente uni na un partido y sigui nan ideanan. Tur idea ta conta, cu e meta di yuda nos isla. Y e ta sinti cu nan ta un famia.

Hopi hende conoce pa su trabao den Luna Foundation, y el a bisa pa loke ta maltrato di bestia y maltrato di mucha, esey ta cana pareu, pasobra na unda tin maltrato di bestia, tin maltrato di mucha. Mester tin un cambio pa nos muchanan, nan ta sagrado. Maltrato no mester ta parti di 'nos cultura'. Aruba ta un isla orguyo y mester mustra mundo cu nos ta para pa un mihor bida pa nos muchanan.

Cristian Soto Garcia

Cristian Soto Garcia, mihor conoci como 'Soto' ta un hoben entrepreneur di apenas 33 aña, kende tabata 'fada y cansa' di politikeria tradicional y a dicidi di forma parti di partido Accion21 y e no kier presenta su mes na comunidad cu storianan bunita, promesanan falso y tampoco 'supuesto solucionnan cu nunca ta bira realidad'. El a bisa cu e ta forma parti di un generacion cu ya caba ta y pa hopi tempo mas lo carga consecuencianan di decisionnan cu nunca hobennan tabatin un voz den dje. Su generacion tin e peso y responsabilidad pa habri caminda y oportunidadnan nobo pa e generacion cu ta sigui nan tras. Soto kier encurasha hobennan pa drenta politica pa sirbi Aruba y duna e mihor di nan habilidadnan.